InfoHub Logo

(Maqataevtyń týǵanyna 50 jyl tolýy keshindegi sóz)

Ómir boıy jaryq ataýlyny kórip-sezýden maqurym qalyp, tymyrsyq tynyshtyqtyń qapas túneginde jaýyn men daýyl kórmeı kún keshýden tunshyqqan ortaǵa syzattan syǵalaǵan sáýle nury da óz bolmysynyń jattyǵymen jan túrshiktirer, jantalastyrar áser ákeleri sózsiz. Sebebi ol ortanyń byqsyqpen tynystaǵan topyraǵyna tirshiliktiń qandaı da bolsyn tabıǵı qubylysy atymen jat. Al jat qubylysty birden qanǵa sińirý — bıologıalyq zańdylyqtan tys nárse. Zańdylyqtan tys qubylys ataýlynyń bári óz tabıǵatymen topan sýy tasyǵandaı alapat ekpin ákeledi. Ol ekpinge tótep berý qıyn, óıtkeni tabıǵat dúleıiniń bári — alapat qubylys.

Jaratylystyń mundaı qubylystarynyń keremettigi ǵumyrynyń uzaqtyǵynda emes — qas-qaǵym sátiniń dúnıeni dúr silkindirer máninde. Naızaǵaıdyń jarqyly, jasyn oty kózdiń nuryn alǵanmen, onyń ǵajaıyp qudiretin kókeıge túıip, dál ózindeı sýrettep jetkize qoıý qan-daı qıyn bolsa, qapyryq aýany jutyp úırengen keýdeni kez kelgen tosyn qubylys ta solaı dereý tunshyqtyryp, qupıasyna boılatpastan óte shyǵady.

Bizdiń uly zamanymyzda sovet azamatynyń kosmosqa ushýy da osyndaı qubylys bolǵany adamzattyń jadynda saqtalady.

Aqyn Muqaǵalı Maqataev taǵdyrdyń óz enshisine buıyrtqan az ǵana jyldarynda poezıaǵa osyndaı qubylys bolyp keldi de, biz sol alapattyń ekpininen tunshyǵyp, dem, tynys alyp úlgergenimizshe, ózin de, óz ortasyn da bolashaqpen jalǵaıtyn Jyr kópirin salyp ketti.

Bizdiń asa aıaýly Ábdilda aǵanyń «bıyl Muqaǵalı poezıasynyń jyly bolýy kerek» degen pikiri kóńilge qatty qonady.

Saltanatty saraılarda óziniń jyr keshterin ótkizem dep júgirmese de, ortalyqtan kitap shyǵaram dep atyshýly aýdarmashy izdemese de, Muqaǵalı baılyǵynyń adamzattyń rýhanı qazynasyna qosylatynynda kúmán joq. Óıtkeni ardaqtysyn aıalaı biletin halqy bar, Otany bar. Al Muqaǵalı poezıasyn maqtanysh sezimmen álemge syıǵa usyna bilý, óz tulǵasynyń deńgeıinde kórsete bilý — tirilerdiń qasıetti paryzy.

---