InfoHub Logo

 — Naǵashym suńǵyla kisi ǵoı, aıtqyzbaı túsindi. "Saǵı, — dedi naǵashym, — sen menimen birge erip Germanıaǵa júr, onda meniń dáriger dosym bar, seni anadan jańa týǵandaı etedi".

Naǵashymnyń aıtýynsha, onyń álgi nemis dáriger dosy aıaqsyz týǵan balaǵa aıaq salǵan eken, onysy ataqty fýtbolıst bop ketipti. Tipti aty ańyzǵa aınalǵan Pele, Maradonalardyń ózi álgi balanyń oıynyna qarap otyryp: "Eger men oınaıtyn komanda osy bala oınaıtyn komandaǵa qarsy oınaıtyn bolsa, men sol kúni alańǵa shyqpas edim, iri eseppen utylyp, jankúıerlerińniń aldynda masqara bolyp jatqannan góri, sonyń ózi durys" degen ǵoı. Al álgi dáriger qolsyz balaǵa qol salǵan eken, onysy ataqty boksshy bolyp ketedi. Tipti aty ańyzǵa aınalǵan Muhammed Álıdiń ózi: "Eger men qazir der shaǵymda turǵan Muhammed Álı bolǵannyń ózinde, osy balaǵa qarsy jekpe-jekten bas tartatynym anyq" — degende, janynda otyrǵan Maık Taıson: "O, ne degenińiz, Muha, men de sony oılap otyr edim, myna balaǵa qarsy rıngke kóterilip, alǵashqy raýndtyń alǵashqy mınótinde-aq edende búk túsip jatqannan góri, sharshy alańǵa shyqpaǵannyń ózi artyq qoı" — degen eken.

Al álgi dáriger mısyzǵa mı salǵan eken, onysy búkil álemniń ǵalymdary bir ǵasyrdan beri sheshe almaı jatqan esepti bes mınýttyń ishinde jańqalap-jańqalap tastap, ǵylymnyń eń mártebeli syılyǵyn qoltyǵyna qysqan kúıi, úıine qaraı baıpań basyp kete barypty. Sonda osynyń bárine esiginiń aldynda qarap turǵan álgi balanyń týǵan ákesiniń ózi: "Oıpyrm-aı, búkil álemniń mıly adamdary jabylyp, bir ǵasyrdan beri sheshe almaı jatqan esepti meniń mısyz balam bes mınýttyń ishinde túte-tútesin shyǵardy-aý!" — dep tań qalypty desedi. Naǵashymnyń sheshimin estigende, sheshem bezektep qoıa berdi: "Jibermeımin Saǵıymdy, Saǵıym osy qalpynda-aq ádemi!" "Qaıran, ana! — deımin ishimnen, — — ár anaǵa óz ulynan asqan sulý perzent bolar ma?!" — Aqyry bári de naǵashym aıtqandaı boldy.

Naǵashym: "Sen Germanıadan qaıtqanda, týǵan anańnyń ózi de tanymaı qalatyndaı ózgeresiń", — degenedi. — Úıge kirip kelgenimde: "Saǵıǵa kelip pe edińiz? — deıdi sheshem syzylyp, — Saǵı úıde joq edi?". "Apa, bul men ǵoı, — deımin, — men Saǵımyn ǵoı!" Sheshem sol kezde baryp tanydy: "Qulynym, daýsyńnan tanydym ǵoı!" — dep kelip, moınyma asyldy. Sodan keıin de kóp ýaqyt úırenise almaı júrdi. Anadaı jerden odyraıyp qarap turyp: "Saǵıjan, sóıleshi", — deıtin. Sóılegen kezimde baryp: "Saǵıymnyń daýsy ǵoı, Saǵıymnyń daýsy!" — Álgi júz qyz qaıda ketti? — dedi Dáýken kúlip. — Júz qyz ketken, betin basyp, bet-betimen: "Aqymaqpyn! Aqymaqpyn! Saǵıdyń osyndaı sulý bolyp ketetinin qaıdan bileıin? Tý, osy bar ǵoı, ómiri sheshimdi asyǵys qabyldaımyn da júremshe?! Oılanaıyn desem ǵoı sol kezde, solaı dep nege aıtpadym eken?!" — Onyń ornyn jańadan júz qyz basqan? — Bular da júz be edi? — dedi Dáýken. — Júz bolmasa da sol toqsan segiz, toqsan toǵyz bolyp qalatyn shyǵar. Qyzdar júrektiń terezesin qaǵady. "Aqyryn, qyzdar, — deımin, — syndyryp alýlaryń da múmkin ǵoı". Bir qyzyǵy bul qyzdar da bir ǵana sóz aıtatyn. — Bular da sóıte me? — Bular da sóıtetin. Bul qyzdar da alys bir kókjıekke oıly pishinde qarap turatyn da, baıaý únmen "Saǵı" deıtin.

"Saǵı, mahabbat dúnıesiniń syrly sezimi adam júregine ádemi án, árge toly áldıimen áser etedi emes pe?! Al eger osynaý janǵa jaǵymdy áýen qyz júregin ǵashyqtyqtyń sazyna bólep, áldebir qıaldan ketpes nurly beıneniń tutqynyna aınaldyrsashe? Kúnniń shuǵylaly jaryǵynda da, túnniń aı dıdarly, kúmis sáýleli tunyǵynda da sol bir beıne janyńdy mazalap, júregińdi tynyshtyǵynan aıyrar syńǵyr qońyraý únine aınalyp alsa ne bolmaq?! Sol dıdar kóz aldyńda máńgiliktiń elesindeı bolyp turyp alsa ne istersiń?! Kúrsinersiń, kúlersiń, birde úmittiń shyraǵyn tutatyp, birde kóńil-kemeńdi saryýaıymnyń tereń teńizine batyryp, arpalysqa túsersiń. Óz sezimin jalpaq jurtqa bar daýsymen aıqaılap jarıa etpese de, sol baqytynyń ólshemindeı baǵaly kóringen, armanynyń asylyndaı ardaqty kóringen janǵa syryn ashsa, qyz-sezimge taǵylar kiná qaısy?! — Qyz osyny aıtyp bolyp, endi jaılap qana burylyp, daýsy dirilge tolyp, baıaý, tipti sybyrǵa tán únmen, biraq ár dybysy áýezge toly aıshyqty únmen: "Men seni súıemin, Saǵı", — deýshi edi. Sonan-soń osy aıtqanynan ózi shoshyp ketkendeı, basyn tákapparlana kóterip alyp: "Joq!", "Joq!" "Maǵan eshteńe de kerek emes!" — deıdi de, betin basyp, jylaǵan kúıi aýlaqqa júgire jóneletin. — Bári de júgire jónelýshi me edi? — dedi Dáýken. — Bári de júgire jóneletin, — dedi Saǵı. Endi Saǵı men Dáýken únsiz otyryp qaldy. Ekeýi de júgire jónelgen álgi qyzdardyń endigi taǵdyrlary ne bolady eken dep oılap otyrǵandaı edi. Únsizdikti Dáýken buzdy: — Endi osy júz qyzdyń birine nege úılenip almaısyń? — Áı, aǵa-aı, — dedi Saǵı, — sol júz qyzdyń qaısysy shyn ishki dúnıeme ǵashyq, qaısysy shyn janym men júregimniń sulýlyǵyna yntyq, sony bilmeı basym qatyp júrgen joq pa? Jýyrda taǵy da Germanıaǵa júretin shyǵarmyn. — Nege?— dep eleń ete qaldy Dáýken. — Qaıtadan burynǵy qalpyma túspekpin, — dedi Saǵı. Dáýken Saǵıdyń burynǵy qalpyn kórmese de, shoshyp ketti: — Qoı, aınalaıyn, balalyq jasama, ádemi túrińdi búldirme, — dedi. — Al eger júz qyzdyń birde-biri janyńda qalmasa qaıtesiń? — Onda bilmeımin, aǵasy, — dep Saǵı basyn shaıqady.

Dáýken osy kezdesýden soń, Saǵıdy kópke deıin kórmeı ketip edi. Birde áldebir tanysynan: "Saǵı úılenipti ǵoı", — degen sóz estidi.

— Germanıaǵa barmapty ma? — dedi Dáýken julyp alǵandaı.

— Germanıada ne bar? — dedi tanysy.

"Bul Saǵıdyń burynǵy ómirinen habarsyz shyǵar" degen oımen Dáýken jaýaptan jaltaryp ketti:

— Aýyryp qalmady ma? — degenim ǵoı.

Álgi tanysy Dáýkenge jaqtyrtpaı qaraǵan kúıi kete bardy. Sol kózqarasynda: "Ne degen ishtar pende ediń? Sondaı ádemi ári aqyldy balaǵa jaqsylyq tileýdiń ornyna. . . " degendeı oı jatyr edi. Dáýken kele jatyryp oılandy: "Eger adamda shynymen júrek terezesi degen tereze bar bolatyn bolsa, ony tek ómiri júrek jamaýmen ótken qart profesor dáriger ǵana kóre alar edi. Dáriger júrekti ashyp tastap shákirtterine bylaı deıdi: "Qymbatty meniń shákirtterim! Adamda bolatyn júrek terezesi degen mynaý. Biz muny eppen ǵana bylaı alyp qoıaıyq. Muny syndyryp alsaq, aýystyryp salatyn materıal da joq". Eger dárigerdiń aldynda óte kórikti ári sulý qyz nemese sondaı jigit jatsa, dáriger: "Oıboı, myna baıǵustyń júrek terezesin syndyryp jibere jazdapty ǵoı. Bul da mahabbatpen ábden-aq oınaǵan eken, biraq júrek terezesi de soǵurlym kóp qaǵylypty", — der edi. "Ne de bolsa adamnyń júrek terezesin bir ǵana adamnyń, óziniń perzentteriniń ákesi nemese anasy bolyp, ómirlik serigine aınalar jannyń qaqqanyna ne jetsin?!" — dedi Dáýken ottyǵyna qol júgirtip jatyp. Sonan-soń shylymyn tutatty da, álgi oılardyń bárin sanasynan serpip tastap, shıraq basyp, júrip ketti.

---