InfoHub Logo

Mal tóldep jatqan kez bolsa kerek. Uly júzdegi Dosan aýlynyń Esaly degen kisisi keshqurym ońasha turǵan úlken úıdiń tusyna kelip:

— Kim bar-aý? — dese, eshkim dybys bere qoımapty. Ol atynan túsip úıge kirse, úıde jan joq. Úı ortasyndaǵy jer oshaqta qalǵan tezek mazdap janyp jatady. Dalaǵa shyǵyp, olaı-bulaı qarasa, aýyl adamdary tóskeıde qozy bólisip júr eken. Esaly úıge qaıta kelip, jalǵyz ózi otyra beredi. «Osy baıdy jurt sarań deýshi edi, kún buryn ne bar, ne joǵyn bilip alaıyn» dep jan-jaǵyna qarasa, keregeniń basynda maıly dastarhanmen betin jaýyp qoıǵan qoıdyń jarty eti jaıýly turady. Kóp keshikpeı-aq daladan baı da keledi.

— Keshtetip júrgen bul qaısyń?

— Men edim, — deıdi Esaly.

Osylaı jón surasyp bolǵan soń, ekeýi ótken-ketkendi aıtyp biraz otyryp qalady. Álden ýaqytta baı:

— Myna qonaqqa neń bar, tamaǵyńdy as, — degen bolady.

Baıdyń sóz saptaýyn burynnan biletin onyń áıeli:

— Úıde et joq edi, — deı salady. Sol kezde Esaly áńgimeniń betin basqa jaqqa aýdaryp:

— Iapyrym-aı, mynaý úıdiń aǵashyn qandaı usta istedi eken-á? — dep úıdiń ýyq keregesine tańyrqap qaraı beredi.

— E, jigitim, bul — Túrkistandaǵy Álken úıshiniń qolynan shyqqan úı, — deıdi ańqaý baı.

— Ózi neshe qanat?

— Segiz qanat.

— Joq, baıeke, segiz qanat emes, — deıdi Esaly ádeıi.

— Bul úıdi óz qolymnan shaptyrǵan myna men ǵoı, segiz qanat? — deıdi baı da eregise túsip. Sonda Esaly:

— Siz segiz qanat deısiz, men alty qanat deımin. Senbeseńiz keregeniń basyn sanaı qoıaıyq. Siz mańdaıshadan bylaı qaraı oń jaǵyn sanap shyǵyńyz. Men sol jaǵyn sanaıyn. Káne, bir, eki, úsh, tórt... — deı bergende, baı:

— Túsindim, túsindim. Seniń ańdyp otyrǵanyń anaý et qoı. Áı, qatyn, asa ǵoı etińdi, — degen eken.

---