Kóńilde daýyl.
Kóńilde ottar janady.
Qýanysh-qaıǵy birin-biri jabady.
Júregim sonda jadyrap, sergip qalady,
Daýyl men ottan raqat, damyl tabady.
Dostarym kóp-aq.
Ózimsip keıde satady.
Jubatyp biri, jylatyp biri jatady.
Júregim sonda nelikten shıyrshyq atady?!
Qalaıdy-aý, sirá, qýanysh, álde... qapany...
Qýanysh, baqyt, ókinish, qaıǵy - bári de oı,
Kótere berem
Kóńilim - jerdiń shary ǵoı.
O, darqan kóńilim!
Ómirimniń tozbas sáni ǵoı!
Mine, taǵy ashý kelip, alqymyma tyǵyldy,
Aqylymnyń esiginen attaı bere jyǵyldy.
Kóldeı tunyq kóńilime qoqys tastap laılap,
Keı pendeler qaınatady-aý, qaınatady-aý zyǵyrdy.
İnim aıtsa bas ızedim, aǵam aıtsa qosh kórdim,
Jannyń bárin jatyrqamaı, jaqsy dedim, dos kórdim.
Aralaryn ajyratý munshama aýyr bolar ma,
Adaldyq pen aramdyq dep atalatyn qos beldiń.
Maqul deıin, kiná ózimde, ózime aıyp taǵaıyn,
Aq janyma, pák janyma qalaı kúıe jaǵaısh.
Adalsyń ba, qolyndy ber, senen tálim alaıyn,
Aramsyń ba, aýlaq-aýlaq mańaıymnan, aǵaıyn.
Arym, mine, sútteı appaq aldyma kep jylap tur,
Jaýtańdaǵan janarynda jalǵyz ǵana suraq tur.
Ómirdegi adamdyqty, adaldyqty terip al,
Qalǵandaryn qulan jortpas qula dúzge laqtyr!

---