Kótibar batyrdyń asy
Kótibar batyr ólerinde balalaryna ósıet aıtyp: «Meniń asyma úsh júzdi túgel shaqyr, kimniń aty báıgeden kelse, attyń bas báıgesin bólek, meniń báıge Kúreńimniń jabýy men ózimniń qarasholaq narkeskenimdi sol at ıesine erekke ber», — degen eken. Kenesary bastaǵan arǵyn eli asqa baryp, Aǵybaıdyń Aqbesti atyn báıgege qosyp, úsh júz attyń aldynda jeke kelgen eken. Atasynyń ósıeti boıynsha báıge Kúreń attyń jabýy men narkesken qara sholaq qylyshty Aǵybaı batyrǵa bergen eken. Muny Kenesary estip: «Kósege barshy ereginiń birin bersin», — deıdi.
Aǵybaı: «Attyń bas báıgesi aıǵyr úıiri qysyraq, masaty kilem japqan taıtuıaq jamby, moınynda tumary bar qara buıra nar, taǵy-taǵylar. Kenesary han qolynda emes pe, bul erekti bermeımin» dese, Kene han jáne bireýdi jiberip: «Kóse, dúnıeqor emes edi ǵoı, qalaı bermedi?» — degizedi.
Sonda Aǵybaı batyr ashýlanyp: «Bas báıge qolynda, bir jeldik pen bir kezdik Aǵybaıdyń qoıyny men qonyshyna syımaıdy dep otyr ma, bermeımin!» — degen eken. Óıtkeni: Kótekeń: «Osy erekti alǵan adamdy meniń árýaǵym qosa jebeıdi, ózi de kem kisige kez bolmas!» — depti. Sóıtip, Aǵybaı batyrǵa eki erdiń árýaǵy qonyp «Aqjoltaı» atanady, úsh júzge aty túgel jaıylǵan er bolady.
Oqýǵa keńes beremiz:
Naýryzbaıdyń jolbarysty óltirýi
Qurmanquldyń Naýryzbaıdyń erligine rıza bolýy
