InfoHub Logo

Kúlásh Ahmetova - Talapkerge

Armanyńda, janyńda jalyn án bar,
Jas talapker, sózime kóńil aýdar
Burynǵydaı kútpeıdi mektep seni,
Burynǵydaı soǵylmas qońyraýlar.

Mektep qaıta esigin ashpas endi,
Ómir – ustaz, aqyldy, aq shash óńdi.
Basqasha endi úıreter bar sabaǵyn,
Qońyraýlar soǵylar basqasha endi.

Byltyrǵydan basqasha bıyl demek,
Bilimiń men aqylyń, kúıiń bólek,
Endi basqa jıyn - toı, kıim kerek,
Endi saǵan shynaıy súıý kerek.

Suraq basqa op - ońaı sheshilmeıdi,
Jasa qansha tentektik, esir, meıli.
Mekteptegi muǵalim keshirgenmen,
Ómir - qatal, ol kúnde keshirmeıdi.

Daýsyz ol kún esińde saqtalary,
Jazylmaǵan ómirdiń aq paraǵy,
Jańa dastan kútedi, jazýyńdy
Kútpeıdi tek klastyń taqtalary.
Endi seni kútedi barlyq joldar,
Kútpeıdi tek mekteptiń partalary.

Kezdesedi daýyl da, dabyl da kóp,
Damyldama, qaımyqpa, qabylda kep.
Úlken oıdan úlken is týar, oılan,
Bolashaqtyń taǵdyry qolymda dep.

Ýaqyt ta emtıhan alar,
Ol syn qorqyta almas.
Kóńilge senim qonsyn.
Jas talapker, bılet al táýekel dep.
Emtıhanda, ómirde jolyń bolsyn.