InfoHub Logo

Úı ıesi áıel qonaqtarynyń kózinshe qolyndaǵy telefonymen taǵy da sóılese bastady.
Qonaqtar bul úıge tús áletinde jınalǵan edi. Áıel sodan beri telefonymen qonaqtarynyń kózinshe birneshe márte áldekimderge ózi qońyraý shalyp sóılesti. Qonaqtar mundaıda eriksiz tártipti baladaı bola qalatyn. Áıel úıde beıne bir jalǵyz júrgendeı-aq, telefonymen emin-erkin, árli-berli júrip sańqyldaı sóılesedi. Keıde sol kúıimen ana bólmege ótip ketip, qaıtadan qonaqtary otyrǵan bólmege kiredi. Áıeldiń qyzylshyraılanǵan júzi telefonmen sóılesken saıyn kúlimsireı túsip, kózderiniń qıyǵyn otyrǵan qonaqtaryna kúlimdegen kúıi aýdara ketýdi de umytpaıdy. Áıel ár sóılesken saıyn óziniń jeke sharýasyna baılanysty ótinishterin telefonnyń arjaǵyndaǵy áldekimderge ózimsingen únmen qadaı tapsyryp jatady. Áıeldiń sóılesken daýys yrǵaǵyna qarap-aq, bul ótinishterdiń qapysyz oryndalatyndyǵyna qonaqtarynyń ózi de kúmánsiz sengendeı edi. Ol ár sóılesýin aıaqtap bolǵannan keıin qonaqtaryna tutqanyń arjaǵyndaǵy jannyń kim ekendigin, qandaı mamandyq ıesi ekendigin baıyppen túsindire bastaıtyn. Sonan soń úı ıesine tán ádetpen jaǵalaı otyrǵan qonaqtaryna báıek bolǵansyp, astan alyp otyrýyn ótinedi.
- Myna telefonnyń ishinde, - deıdi áıel osyndaı kezekti bir sóılesýin aıaqtap bolysymen qonaqtaryna qolyndaǵy telefondy kórsetip. - barlyq mamandyq ıeleriniń tizimderi engizilgen. Bári de sharýaǵa kerekti adamdar. Tipti dúkenshi qyzdyń da esimi bar. Tek bir ǵana mamandyq ıesi engizilgen joq.
Qonaqtar "bul kisige qadiri kem bop turǵan ol qandaı mamandyq ıesi boldy eken?" degendeı bir-birine qarasty.
- Qanekı, as alyńyzdar, - dedi áıel jaıdarylana kúlip. - Astan alyp otyryńyzdar.
Kenet áıelge dastarqan basynda otyrǵan sándi kıingen bir er adam suraq qoıdy:
- Keshirińiz, - dedi ol áıelge qarap otyryp. - Álgindegi siz aıtqan mamandyq ıesi qandaı mamandyq boldy eken dep oılanyp otyrǵanym.
Áıel qonaǵynyń sózine syńǵyrlaı kúlip aldy.
- Myna telefonnyń ishinde, - dedi sonan soń áıel qolyndaǵy telefondy silkileı ustap. - sharýa tapsyrýǵa jararlyq kerekti mamandyqtardyń bári de engizilgen, tek muǵalim ǵana joq.
Áıeldiń myna sózinen keıin otyrǵan qonaqtar taǵy da bir-birine qarasty.
- Muǵalimge, - dedi áıel sosyn taǵy da bir syńǵyrlaı kúlip alyp, - táıiri, qandaı sharýa tapsyra qoımaqsyz?
Biraq suraq berýshi qonaq áıelmen birge qosyla kúlgen joq jáne bylaı dedi:
- Onda siz qoǵamdaǵy eń mańyzdy sharýamen aınalysyp otyrǵan mamandyq ıelerin umyt qaldyrǵan ekensiz.
Áıeldiń júzindegi álgindegi kóńildi kúlkisi lezde joıylyp, qonaǵyna ańtarylǵan kúıinde qarap qaldy.

---