InfoHub Logo

Medısına joǵary oqý oryndary stýdentteriniń shákirtaqysy 20 % kóbeıedi, dep habarlady QR Densaýlyq saqtaý mınıstrliginiń Ǵylym jáne adamı resýrstar departamenti.

2022 jyly respýblıkalyq búdjettiń esebinen 4700 bilim berý granty bólindi, onyń 1500-i rezıdentýraǵa bólingen.

2023 jyly Memleket basshysynyń tapsyrmasyn iske asyrý maqsatynda respýblıkalyq búdjettiń esebinen rezıdentýra granttarynyń sanyn 2500-ge deıin ulǵaıtý josparlanýda.

Sondaı-aq, Prezıdent pen «Amanat» partıasynyń tapsyrmasy boıynsha shákirtaqy aıtarlyqtaı ulǵaıtyldy. Mysaly, bakalavrıat úshin ol 2 esege jýyq, ınternderde 25%-ǵa, rezıdentterde, magıstranttarda, doktoranttarda 2021 jyly 15%-ǵa ulǵaıdy.

«2025 jylǵa deıin shákirtaqyny jyl saıyn 15% jáne 20%-ǵa ulǵaıtý josparlanýda. Bul jaqsy oqýǵa qosymsha serpin beredi jáne bizdiń JOO-larǵa myqty talapkerlerdi qosymsha tartady», - deıdi departament dırektory Dáýlet Aldyńǵurov.

Sondaı-aq, onyń aıtýynsha, Densaýlyq saqtaý mınıstrligi 2021 jyldan bastap óńirler ótinimderiniń negizinde rezıdentýrada granttardy bólýdi engizdi. Bul densaýlyq saqtaý júıesiniń kadrlyq saıasatyn sapaly júrgizýge múmkindik beredi.

2022 jylǵy 8 aqpanda salalyq biliktilik sheńberi bekitildi. Osy oqý jylynan bastap sanıtarıalyq-epıdemıologıalyq qyzmet mamandaryn daıarlaýdyń 5 jyldyq baǵdarlamasy engizildi.

Sondaı-aq, 21 kásibı standartty ázirleý boıynsha jumys júrgizildi. Bul jumys jalǵasýda jáne 2023 jyly 36 kásibı standarttardy ázirleý jáne ózektendirý josparlanýda.

Mınıstrlik medısına qyzmetkerleriniń biliktiligin arttyrýǵa erekshe kóńil bóledi. Máselen, bıyl ǴARD búdjettik baǵdarlamasynyń sheńberinde 4200 dáriger, onyń ishinde 138 sheteldik jáne 2650 meıirgerdi oqytý uıymdastyryldy.

---