InfoHub Logo

Belgili shyǵys ǵulamasy Ál-Farabıdiń atymen atalatyn qasıetti qara shańyraq Qazaq Ulttyq Ýnıversıteti – qazirgi tańda elimizdegi eń jetekshi joǵarǵy oqý oryndarynyń biri bolyp tabylady. Men dál osy ýnıversıtettiń stýdenti ekenimdi maqtanyshpen aıta alamyn. Osydan 5-6 jyl buryn bul ýnıversıtet men úshin tek alystaǵy arman bolatyn. Mektepti bitirip, alǵash QazUÝ-dyń tabaldyryǵyn attaǵan kezim áli kúnge deıin esimde. Sheksiz qýanysh, ata-anamnyń aqtalǵan úmiti, armanǵa jaqyndaǵan bir qadam…

Kezinde Qazaq ádebıetiniń maıtalmandary, ult zıalylary Zeınolla Qabdolov, Muhtar Áýezov dáris ótkizgen aýdıtorıalarda qazir men bilim alyp jatyrmyn. Men úshin bul úlken mártebe.

1934 jyly irgesi qalanǵan QazUÝ quramynda qazir 16 fakúltet, 98 kafedra, 20 ǵylymı-zertteý ınstıtýttary men ortalyqtar, 2000-nan astam profesorlar, doktorlar, ǵylym kandıdattary ýnıversıtette qyzmet atqarady. Sonymen qatar, ýnıversıtette kópsalaly joǵary kásibı bilim júıesi boıynsha 32000 daı stýdent bilim alýda. QazUÝ-dy elimizdiń barlyq joǵary bilim berý júıesiniń tiregi, bilikti mamandar ordasy deýge bolady. Oǵan dálel qazirgi tańda Ýnıversıtetimizdiń myńdaǵan túlekteri Qazaqstannyń jáne onyń aýmaǵynan tys jerlerdegi óndiristiń barlyq salalarynda tabysty eńbek etýde.

2020 jyly World University Rankings QS (Uly Brıtanıa) bedeldi reıtıńtik agenttiginiń zertteý qorytyndylary boıynsha QazUÝ 165-orynnan kórinip, álemniń eń úzdik ýnıversıteti qataryna endi. Osylaısha, bizdiń ýnıversıtet Ortalyq Azıa men TMD-daǵy teńdessiz kóshbasshylyǵyn taǵy da dáleldedi. Kólemi 100 gektarǵa jýyq, kórkine kóz toımaıtyn QazUÝ qalashyǵynyń munda oqıtyn men sıaqty stýdentter úshin orny bólek dep oılaımyn. QazUÝ qalashyǵynyń taǵy bir ereksheligi, munda - Ó.A. Joldasbekov atyndaǵy Stýdentter saraıy, Qazaq ulttyq aspaptar orkestri, kórkemóner úıirmeleri men ártúrli stýdenttik uıymdar jumys isteıdi.

Jalpy, QazUÝ — bul múmkindikter mekeni, stýdentterge óte úlken múmkindik beredi. Óz basym bul jerde júrip 5 jyl, ıaǵnı 4 jyl bakalavrıat- Avtomattandyrý jáne basqarý  mamandyǵyn támámdáp, dál qazirgi sátte 1 kýrs magıstranty atanyp, óte úlken tájirıbe jınap kelemin. Ýnıversıtet kóleminde júretin qoǵamdyq, ǵylymı, mádenı sharalarǵa óz úlesimdi qosyp, júktelgen ár iske jaýapkershilikpen qaraýǵa tyrysamyn. Atap aıtqanda, 2017- 2018 jyldary Aqparattyq tehnologıalar fakúltetiniń «Suńqar» stýdentter men magıstranttar kásipodaǵynyń uıymynyń tóraǵa orynbasary qyzymetin atqardym, sonymen qatar 2018 – 2020 jyldar aralyǵynda Aqparattyq tehnologıalar fakúltetiniń Stýdenttik Dekany qyzmetin atqardym. Aldaǵy ýaqytta osy alǵan bilimim men úırengen tájirıbem úlken kómek bolatynyna kúmánim joq. Osy jolda óz tájirıbelerimen bólisip júrgen ustazdaryma jáne de jetekshilerim Ýrazgalıeva Svetlana Amanjolovna  apaıyma alǵysymdy bildiremin.

Ál - Farabı atyndaǵy Qazaq Ulttyq ýnıversıtetiniń stýdenti ataný – asqaq arman, zor mártebe. Sondyqtan, men úshin osy oqý ornynda bilim alý – úlken maqtanysh. Máńgilikke jasaı ber, órkendeı ber, gúldene ber, QazUÝ – ym!

Ál-Farabı atyndaǵy QazUÝ, Mashınalyq oqytý mamandyǵynyń

1 kýrs magıstranty: Ábdihalyq E.Ú.

Jetekshisi: Ýrazgalıeva S. A.

---