Ókinishti kóp ómir ketken ótip,
Ótkizdik bir nársege bolmaı jetik.
Oıshyldyń men de sandy birimin dep,
Talap, oısyz, maqtandy qaldym kútip.

Úlgisiz jurtty úıretip, qaldyq keıin,
Kóp nadandar ózine tartar beıim.
Arylmas ádet boldy kúlkishildik,
Yrjań-qyljań ıt minez degendeıin.

Týra tildi kisini deımiz orys,
Jırenip, jylmańdyqty demes burys.
Jylpyldaqtan aırylyp, senise almaı,
Adamdyqty joǵaltar aqyr bul is.

Senimi joq sermende1 syrdy buzdy,
Anyq taza kórmeımiz dosymyzdy.
Qylt etpege kóńildiń keshýi joq,
Júreginde jatady ókpe syzy.

Dos-asyqtyń bolmaıdy bótendigi,
Qosylǵan bosaspaıdy júrek jigi.
Bizdiń dospyz, asyqpyz degenimiz –
Jalǵandyqtan jasalǵan kóńil júgi.

Senisken dosym da joq, asyǵym da,
Aqyry óleń qyldym, jasydym da.
Kórmegen kóp dúnıe kól kórindi,
Kirlemegen kóńildiń ashyǵynda.

Qudaı bergen bul dostyq – kánniń2 biri,
Muńdasqanda qalmaıdy kóńil kiri.
Qoldan dostyq jasap em bolar-bolmas,
Itmuryndaı nadannyń jyrtty biri.

Sol dosty saıa tappaı izdeıdi jan,
Joqtaıdy kúńirenip, qozǵalyp qan.
Jaý jabylsa buzylmas jan kórmedim,
Artyq joldas tappadym tatýlyqtan.


1 Sendelip bosqa júrgen adam. Negizgi parsynyń shahrbant degen sózinen shyqqan.
2 Kán (arabsha) – ken, kenish (rýdnık). Aýyspaly maǵynada: meıirimdilik bastaýy, qaıyrymdylyq, izgilik; negizgi maǵynasynda Qudaıdyń epıteti.

---