InfoHub Logo

Taqyryby: Ómir gúli – analar!
Maqsaty: Kóktemniń alǵashqy merekesi – analar merekesi jóninde túsinik berý. Balalardy analaryna degen súıispenshilikke baýlý, ana eńbegin ardaqtap, qurmetteı bilýge tárbıeleý.
Kórnekiligi: qanatty sózder, sharlar, gúlder, sýretti plakattar.

Júrisi:
Tárbıeshi:
- Qurmetti qonaqtar, ustazdar! Búgin bizde úlken mereke, sizderdiń aldaryńyzda mektepaldy daıarlyq synyp tárbıelenýshileri ózderi daıyndaǵan bılerin bılep, ánderin shyrqap, taqpaqtaryn aıtpaqshy.
Kóktemniń alǵashqy aıyndaǵy eń alǵashqy mereke – 8 naýryz – analar merekesi de kelip jetti. Ana — árbir adam balasy úshin eń ystyq, janǵa jaqyn, maǵynaly da qasterli sóz. Adamzat balasy alǵash dúnıe esigin ashqanda ananyń aq sútimen boıyna nár alady, ana qushaǵyna enip, ana meıirimine bólenedi. Adamnyń aýzynan shyǵatyn eń alǵash sózi de – «ana». Mirjaqyp Dýlatov aǵamyz aıtqandaı, bizdi súıetuǵyn, kúıetuǵyn, árqashan qamymyzdy oılap júretuǵyn abzal jandy adam, bul – ana. Qanshama baılyq ıesi bolsań da, álemge áıgili adam bolsań da, anańdy, onyń saǵan jasaǵan jaqsylyǵyn umytpaý – seniń ómir boıyndaǵy boryshyń. «Qarıasy bar úıdiń qazynasy bar» dep beker aıtylmaǵan, ortamyzdaǵy asyl ájelerimiz de, analarymyz da aman bolsyn! Osy merekege oraı «Ómir gúli – analar» taqyrybyndaǵy merekelik sharamyzdy bastaýǵa ruqsat etińizder!
Mádına:
Jınalyppyz búgin, mine, bárimiz,
Úlken - kishi jasymyz, kárimiz de.
Qosh keldińiz, qadirmendi analar,
Gúl - gúl jaınap bizdiń mynaý keshimizge!
Toǵaı:
Shýaqty kóktem keldi gúlin alyp,
Kóktemniń merekesi búgin anyq.
Ómirdiń kóktemi de, gúli – analar.
Ana dep bas ıedi kúlli halyq!
Bı: «Qyzdar merekesi». Oryndaıtyndar: Ahmedıar - Nursha, Nuraly - Mádına, Toǵaı - Jannur.
Aıaýlym:
Ana degen – jaryq juldyz shyraǵyń.
Ana degen – qaınar ystyq bulaǵyń.
Ana degen - ómirdegi qamqoryń.
Ana degen – súıeneriń, jan qurbym.
Altynaı:
Biz ǵana emes qadir tutqan balalar,
Analardan týǵan nebir danalar,
Ana degen tirshiliktiń tiregi.
Armysyzdar, qasıetti Analar!
Nursha:
Aıaýly da altyn nurly anashym,
Júregimmen máńgi birge bolasyń.
Sen asqarsyń, sen aspansyń, bıiksiń,
Sen darhansyń,
Sen jomartsyń, danasyń!
Mırjan:
Asyl anam - altyn jan, asqar taýym,
Araılanyp aldymnan atqan tańym.
Álpeshtediń, áldılep, aıaladyń.
O, anashym, bir ózińsiń saıa baǵym!
«Mysyq» bıi. Oryndaıtyn: Gabıtova Asylaı. (- Men ádemi mysyqpyn máý - máý - máý, tez júgire alamyn, jyly jerde uıyqtaǵandy jaqsy kóremin. Menen tyshqandar qorqady. Máý - máý - máý)
Mıras:
Ómirde qymbat eken ana degen,
Ómiri gúl jaratyn balamenen,
Bizderdi aq gúlindeı aıalaǵan,
Men onyń jalǵasy bop qala berem.
Albına:
Ana - bala, bala - ana bir uǵym,
Bir - birińsiz joq olardyń baqyty.
Ana - bala, bala - ana árdaıym,
Birge júrsin, birge kórsin shattyqty.
Aqyrys:
Ana tursa qushaqqa alyp balasyn,
Baqyt, shattyq belgisindeı jarasym.
Qabaǵyńdy kirbiń shalmaı ómirde,
Qýanyshqa kenele ber, Anashym!
Nadıra:
Ana deımiz bárimiz de ańqyldap,
Ana deıdi sábıi de jarqyldap.
Ana degen báıteregi ómirdiń,
Ana degen altyn qazyq, altyn baq!
«Úndi» bıi. Oryndaıtyn: Jardemova Nadıra.
Dáýlet:
Umytpańdar analardyń áldıin,
Sol áldıden bastalady án - kúıiń.
Sýytpańdar eljiregen jan kúıin,
Ardaqtańdar, ardaqtańdar anany!
Jannur:
Ana desem sezim bıler tym ystyq,
Jarasymdy adamdarǵa týystyq.
Bar adamǵa berse ananyń meıirimin.
Ornar edi bar álemde tynyshtyq.
Asylaı:
Ana degen - asyly ǵoı dalanyń,
Ana degen - saǵynyshy balanyń.
Bul ómirge qýanyshpen nur tókken,
Bas ıemiz aldynda biz ananyń!
Saǵynysh:
Súrinsem súıep, bolatyn tirek,
Sol úlken júrek.
Sen eken jalǵyz, Jan - Ana!
Barlyǵy (hormen):
Aq sútinen jaralǵan,
Aq sútinen nár alǵan,
Anaǵa bas ıemiz!
«Ana týraly birer sóz». Sóz kezegi balalarǵa beriledi.
Mádına: Aq tileýli, keń peıildi analarymyz ómirdiń bastaýy, tirshiliktiń sáni. Analar bizdiń basty baılyǵymyz. Ana - adamzat meken etken jer sharynyń ár túkpirinde, ár úıde meıirim men mereıdiń, dostyq pen týystyqtyń týyn tikken aıaýly jan.
Dáýlet: Báısheshek sonshalyqty náziktigine qaramastan qardyń astynan búrshik jarady. Bizdiń asyl analarymyz da sonshalyqty náziktiligine qaramastan barlyq qıyndyq ataýlyǵa tózimdi.
Altynaı: Adam eń aldymen ana aldynda qaryzdar. Ana qaryzy altynǵa bóleýdi, aq orda salýdy qalamaıdy. Ana balasynyń er jetip adal bolýyn qalaıdy. Anaǵa osydan artyq tartý taralǵynyń keregi joq.
Asylaı: Ana – barlyq ómirdiń bastaýy. Ol adamdy ómirge ákeledi, ony tárbıeleıdi, ósiredi. Adam boıyndaǵy barlyq asyl qasıet kúnniń nurynan, ananyń aq sútinen darıdy.
Dılnaz: Adam úshin eń aıaýly, qasterli jan - ana. Ol bala dúnıege kelgennen bastap, óziniń jumsaq alaqanyn, jyly júzi, ystyq qushaǵy men meıirimin, mahabbatyn arnaıdy. Ana mahabbaty adamǵa qanat bitiredi, kúsh beredi.
Esenkeldi: Meniń anam - eń qurmetti jan. Ol óte ádemi, meıirimdi, qaıyrymdy. Ol maǵan ómir syılady. Rahmet, saǵan anashym!
«Úndi» bıi. Oryndaıtyn: Qýanǵalı Mádına.
Saǵynysh:
Halqymyzǵa bılik aıtar danalar,
Danalardyń ózi analardan jaralar.
Júreginiń bir bólshegi bala úshin,
Sizden jaqyn adam bar ma, analar?!
Esenkeldi:
Balaǵa eń jaqyny siz ǵoı ana,
Sizdiń ystyq qushaǵyńyz bizge pana.
Sizderge teńestirer esh nárse joq,
Teńese alar oǵan tek Otan ǵana.
Áıgerim:
Analardy súıemiz,
Sózin oıǵa túıemiz.
Ájeni de ardaqtap,
Ádeppen bas ıemiz.
Álpeshtegen balasyn
Ana – baqyt, ana – jyr.
Árkim súıip óziniń
Maqtan eter anasyn.
Áıgerim:
Aqyl quıǵan sanama
Kúnnen artyq rasynda.
Kún alysta, al anam
Ylǵı meniń qasymda.
«Kóńildi balalar» bıi. Oryndaıtyndar: bir top tárbıelenýshiler.
Nuraly:
Shýaq tógip kúlimdeıtin qarasam,
Anashymdy kúnge ǵana balasam.
Jer betinde eń jaqynym - ózińsiń
Mápeleısiń, aıalaısyń árqashan!
Ahmedıar:
Aınalaıyn anashym,
Kókte kún bop janasyń.
Et júregiń eljirep
Qushaǵyńa alasyń.
Syılaǵan maǵan ómirdi
Anashym meniń aıaly.
Júregi jumsaq kóńili
Kún shýaqty saıaly.
Bekulan:
Teńdesi joq danasyń,
Arqa súıer panasyń.
Eńbegińdi aqtaımyn,
Aman bolshy anashym!
Tárbıeshi:
- Osymen «Ómir gúli - analar» atty erteńgiligimizdi aıaqtaımyz. Qymbatty analar, jer betine jaqsylyq nuryn seýip, aralarymyzda aman - esen júre berińizder demekpin.

Atyraý oblysy, Jylyoı aýdany,
Qulsary qalasy, №21 jalpy negizgi bilim beretin mekteptiń
mektepaldy daıarlyq synyp tárbıeshisi
Iksangalıeva Jumabıke Ótegenqyzy