![Optımızm týraly birer sóz](http://infohub.kz/uploads/thumbnail/20240120093526413_big.jpg)
- 27 qar. 2019 00:00
- 381
Optımızm týraly birer sóz
Optımızm — tirshiliktegi qıynshylyqtar men keleńsizdikterge qaramastan barlyq nárseniń jaqsy bolatynyna jorý, úmittený, sený degendi bildiredi. Iaǵnı úmitsizdikke, kúızeliske túspeý, bolashaqqa senimmen qaraý degen sóz. Taqyrypty keńinen ashý úshin optımıster men pesımıster týraly qysqasha sıpattamalarǵa kóz júgirteıik:
Optımıster:
— Alda jarqyn bolashaq kútip turǵanyn, jaǵdaıdyń búgingiden de jaqsyraq bolatynynan úmittenedi.
— Maqsatyna jetetinine senimdi bolady.
— Ómir tosynsyılarǵa toly dep biledi.
— Qıyndyqqa tap bolǵanda sheshimi tabylatynyna, jaǵdaıdy retteýge shamasy keletinine senedi.
— Keleńsizdiktiń ózinen utymdy tarapyn kóredi, ómirlik sabaq dep qaraıdy.
— Aınalasyndaǵy keleńsizdikterden shaǵymdana bermeıdi
Pesımıster:
— Ne istesem de jaǵdaıym ońalmaıdy, jumysym júrmeıdi dep oılaıdy.
— Únemi ýaıymdap, úreı ishinde júretin sebep taýyp alady.
— Barlyq keleńsizdikter maǵan ǵana keledi dep túńiledi.
— Eshbir jumysym men oılaǵandaı júrmeıdi degen senimde.
— Basyna is tússe ózin kinálap, stress, kúızelis ishinde júredi.
Danyshpan babalarymyz «jaqsy sóz — jarym yrys!» dep beker aıtpaǵan ǵoı! Jaqsy sóz, bolymdy oı men boljamdar bolymdy sezimderge jol ashady. Bolymdy sezimder bolsa óz kezeginde pozıtıvti nátıjelerge sebepker bolady. Máseleniń shemimine, jumystyń qarqynyna, ónimdilikke, adamdarmen jaqsy qarym-qatynasta bolýǵa, qysqasy qaı jaǵynan bolmasyn jaqsy áser etedi.
Bul deginimiz tek jaqsy oılap, kedergiler men qaýipterdi elemeý kerek degenge kelmeıdi árıne. Keleńsizdikterdi eskere otyryp, alǵa qaraı qadamdy nyq basý degen sóz.
AQSH-tyq jazýshy Artýr Ýord (W. Arthur Ward) optımızmdi bylaı sıpattaıdy: «Shynaıy optımıs keleńsizdikterdi moıyndaıdy, alaıda sheshimin tabady, qıyndyqtardy kóredi, alaıda tótep bere alatynyna, bul ótpeli kezeńnen óte alatynyna senedi. Bolymsyz kúıge túsedi, biraq bolymdy kúıin kórsetedi. Eń jamanyna da ashyq, alaıda eń jaqsysyn kútedi. Shaǵymdanýǵa sebebi bar, alaıda kúlimdeýdi tańdaıdy».
Albert Eınshteın: «Tym aqyldy bolǵandyqtan emes, keleńsizdikterdi sheshýden, tótep berýden bastarpaǵanym úshin jetistikke jetýdemin» degen eken. Iaǵnı keleńsizdikke túskende túńilmeı, máseleniń sheshimi jolynda qulshynysty arttyrý kerek.
Jaqsy aıtý, jaqsyǵa jorý, jaqsy tarapyn kórý jáne adamdarǵa jaqsylyq jasaýdyń densaýlyqqa, ásirese rýhanı saýlyqqa óte paıdaly ekendigi ǵylymı túrde kóp dáleldengen dúnıe. Qaterli isik sekildi aýyr dertterdi jeńip shyqqandardy nemese múldem sheshilmeıdi degen keleńsizdiktiń túıinin sheshkenderdi qaraıtyn bolsańyz qıyndyqqa optımısik kózqaras arqyly tótep bergenin baıqaýǵa bolady. Tipti ǵylymı zertteýlerdiń ózi optımısterdiń pesımısterge qaraǵanda uzaq jasaıtynyn kórsetýde. Óıtkeni pozıtıvti oı kúızelis pen stres ataýlyny azaıtady. Iaǵnı optımızmdi streske qarsy em-shara dese artyq etpeıdi.
Demek ómirge optımısik kózqaraspen qaraý jetistik pen baqyttyń jáne salaýatty ómirdiń kilti deýge bolady. Sondyqtan jaqsy aıtyp, jaqsy oılaýǵa, jaqsy tarapyn kórýge, jaqsy bolýǵa tyrysaıyq...
Oqýǵa keńes beremiz:
Optımıster men pesımıster