Oıladym bir sóz jazaıyn-da,
Baıqoshqardaǵy aǵaıynǵa,
Men ólsem, qoısyn dep bylaı:
Kebinim bolsyn kóılek, dambal,
Basyma orap aq oramal,
Aıaqqa shulǵaý sal oraı!

Bulaqtan arman beligir bar.
Renjimeı, sonan kór qazyńdar,
Tereńdep baryp laqattaı,.
Kebisim, másim, shapan, shalbar,
Taqıa, tymaq, jelet, ton bar.
Bólisip alsyn talaspaı!

Qabyrdy qazǵan, arýlaǵan,
Sony alyp, duǵa qylsyn maǵan,
Demesin «bular azǵantaı!»
Beshpetim, etik, saǵat qalsyn,
Qabysh pen Ahat, Zıat alsyn,
Atadan mıras alǵandaı.

Sandyqtap ábden jaıǵap al da,
Tamymdy bekit, qulyp sal da,
Bolmasyn ashyq qalǵandaı.
Býmajnık ashsań, kiltim bar,
Ústinde peshtiń qulybym bar,
Esikke syrttan salǵandaı!

Et te bar, maı men baýyrsaq bar,
Asyqpaı iship, jep alyńdar,
Shaı da bar, sender qanǵandaı.
Aparmaı elge, kómip munda,
Minerlik atym tur osynda,
Biriń shyq elge barǵandaı!

Sálemim – elden keshý surap,
Jalynyp tilep, kettim jylap,
Jaqyn dep, jat dep talǵamaı.
Artymnan aıap duǵa qylsyn
Elsizde óttim, oılaı júrsin
Alǵys aıtsyn, qarǵamaı!

Ákemnen óngen bar aýlyma,
Kórshi, dos, quda, baı ulyna,
Sálemim qaǵas qalmaǵaı.
Ómirge joq qoı qumarym da,
Jetpis úsh jasqa shyǵarymda.
Aınaldy-aý ómir arbadaı.

Sálem de barsha aýylyma,
Jeńgem men kári, baýyryma,
Balaǵa sheıin qaldyrmaı.
Kelinder, áıel, erkek bala,
Qalmasyn qaǵas biri shala,
Tyńdasyn jylap, zarlamaı.

Aıtqanmyn: «Ólsem, jylama»,– dep,
«Týǵan jan ólmeı tura ma»,– dep,
Jer qoıar kimdi jalmamaı.
Ókinish emes ólim maǵan,
Ótkizip qoldan qoshtaspaǵan –
Jalǵyz-aq osy arman-aı.

İshimdi jalyn qaptaǵany-aı,
Shybyn jan tynym tappaǵany-aı.
Qapyda derttiń shalǵany-aı.
Járdemshi eshkim qasymda joq,
Basymdy súıer jarym da joq,
Jalǵyzdyqta ótken jalǵan-aı!

---