InfoHub Logo

Iá,búgin ádettegishe tańǵy saǵat 4:47 de oıanyp aldym. Dala áli tas qarańǵy. The Ritz Carlton-nyń shamdary aıqyn kórinip tur. Qulaqqabymdy alyp lırıkalyq mýzykany qosyp naızadaı kirpikterimdi bir-birine aıqastyrdym. Mýzykanyń jetegimen kóz aldyma tamyljyǵan tamyz aıynyń beınesin alyp keldim. 

Aq Jaıyqtyń jaǵalaýynda erkelep sýmen oınap kele jatqan Aısha. Samal jel qoıý qara  jibekteı  shashtaryn aqyryn ǵana qozǵaltyp qoıady. Syńǵyrlaǵan bıkeshtiń kúmis kúlkisimen birge ándetken qustar da osy keshtiń sánin keltirip turǵandaı. Kúnniń nury batysta erekshe batýshy edi. Mine qazirde  týra solaı, qyp-qyzyl bolyp kózdiń jaýyn alyp, janyńdy jaılandyryp uıasyna baǵyttap barady. Aq Jaıyqtyń tolqyny bir-birimen jarysa jaǵaǵa kelip-ketip jatyr. Qaıyńdaı túzý,appaq aıaqtarymen Aıshada osy tolqynnyń kelýin kútip oınap júr. Kóbelekterde de erke qyzben birge oınaǵysy kelgendeı janynan keter emes.  Sulý bıkeshtiń súıirlengen qulaqtary,  aqqýdaı moıyny, aqquba kelbeti bári-bári tamyzdyń tamyljyǵan kezine jarasyp-aq turǵandaı. Qandaı ǵajap kórinis deseńshi...

«Janók,uıyqtap qalma! Sabaqqa barasyń ǵoı»-degen janymdaǵy kórshi qyzdyń daýysynan oıanyp kettim. Oıana sala, kúndegi ádetim boıynsha terezege qaradym; taǵy da aq ulpa qar japalaqtap tur eken. Kún óz uıasynan búgin tym kesh shyǵady-aý dep oılap jatyrmyn. Qaharly qystyń kórinisin kórip, qıalymnyń sheksizdiginen jasap alǵan túsimdi eske alyp tezirek jaz bolsa eken dep ishteı ózimmen únsiz sóılesip taǵy da syrtqy kóriniske nazar saldym. Qys ta ádemi. Aınala aq qar. Peıili taza,appaq bolǵan bul mezgildiń de tátti tustary jeterlik. Osyny oılap jatqan shaǵymda Alataýdyń arǵy jaǵynan shıki jumyrtqanyń sarylyǵyndaı bolǵan  kún sáýlesiniń jymıyp shyǵyp kele jatqany da baıqaldy. Túý,shirkin. Qandaı keremet! Perdemniń arasynan syǵalaǵan kúnniń shýaǵy meniń tańǵy kóńilimdi nurlandyryp jiberdi! Qaıyrly tań!

---