InfoHub Logo

Aǵymdaǵy jyly CES 2017 kórmesinde eń qyzyqty tehnologıalardy usynǵan avtokólik shyǵarýshylary boldy. Avtokólikter qozǵalys quraly bolyp qana qoımaı, naǵyz gadjetke aınalýda. Olar túrli elektronıkamen jabdyqtalyp, keıde ádettegi kólikterdi umyttyrady. Al pıltosyz avto – múldem ózgeshe taqyryp. Kóptegen kompanıalar avtokólikti avtomatty túrde basqarý tehnologıasyn synap, qoldanýǵa tyrysýda. Sonymen qatar kólikke jasandy ıntellekt ornatý da keń tanymaldyq alyp keledi. Munyń barlyǵyna CES 2017- tanystyryldy.

Toyota Concept-i

Mysaly, CES 2017-de Toyota kompanıasy Concept-i túrinde keleshek avtokólikterine qatysty qıalyn kórsetti. Concept-i-diń eń negizgi ári utymdy tusy – derbestik emes, avtokóliktegi Yui jasandy ıntellekti. Ózindik ıntellektige ıe mundaı kóliktiń negizgi maqsaty – qozǵalys prosesi men adam men kólik qatynasyn jeńildetý. Munan jeńil ne bar? Kóliktiń basqyshyn basyp, joldan kóz almasańyz bolǵany. Alaıda Toyota kompanıasynyń bolashaqqa kózqarasy ózgeshe. Avtokólikke ornatylǵan Yui jasandy ıntellekti júrgizýshimen daýys jáne tústi habarlamalar arqyly baılanysyp qana qoımaı, deneńizge janasa alady. Qorqynyshty bolǵanymen, Toyota kompanıasynyń bolashaqqa kózqarasy – osyndaı sıpatta. Árıne, Concept-i derbes júrý múmkindigine de ıe. Dese de avtokóliktiń basty maqsaty – júrgizýshini qoldaý. Jasandy ıntellekt adamnyń kóńil-kúıin seze alady. Eger ol júrgizýshiniń enjarlyǵyn baıqasa, baılanysqa túsedi nemese júrgizýshige tynyǵý kerektigin basqa da ádistermen jetkizedi.

Divergent Blade

Divergent 3D toby aldaǵy 10-15 jyldy ózgeshe kóredi. Ataýynan belgili bolǵandaı, kompanıa 3D baspa boıynsha mamandandyrylǵan. Iaǵnı avtokólikterdi basyp shyǵarý. Olardyń týyndysy Divergent Blade sýperkar bolyp tabylady jáne nebary 2,5 sekýndta 100 km/saǵ jyldamdyqpen júıtkı alady. Bul avtokólik gaz nemese janarmaımen júredi, biraq elektrokólikterge qaraǵanda anaǵurlym ekologıalyq taza kólik bolyp tabylady. Sebebi 3D baspada basyp shyǵarylǵan Blade konveıerde jınastyrylǵan elektrokólikpen salystyrǵanda, ekologıaǵa zıany 65%-ǵa tómen. Sonymen qatar Blade-tiń shanaǵy ǵana emes, shasıi de prınterde basyp shyǵarylǵandyǵy tańdandyrady. Avtokólik negizi de 3D prınterde basyp shyǵarylǵan. Ol 28 kılogramm allúmınıı, 19 kılogramm karbonnan turady. Shasıdiń jınastyrylýyna 3 adam eńbegi men 30 mınýt ýaqyt qajet. Aıtpaqshy, Divergent Blade salmaǵy 630 kılogrammdy quraıdy. Al qozǵaltqyshynyń kúshtiligi 700 at kúshine teń. Bul aqylǵa syıǵysyz jetistik.

Pıltosyz avto

CES 2017-de tanystyrylǵan kólikterdiń basym bóliginiń negizgi ıdeıasy – kóliktiń derbes júrýi. Quddy álem tutastaı osy oıǵa berilgendeı. Honda kompanıasy pılotsyz avtoǵa degen kózqarasyn dál osy sıpatta tanytty. Onyń usynǵan NeuV kóligi – eki adamǵa eseptelgen jáne kompanıa pikiri boıynsha Uber-ge arnalǵan minsiz avtokólik. Iaǵnı júrgizýshisiz taksı. Honda ózdiginen qozǵalatyn oryndyqtardy da kórsete ketti. Dese de olardyń nege qajet ekeni múldem túsiniksiz. Oǵan qosa japondyqtar júrgizýshige ilese alatyn nemese joldaǵy kólik keptelisinde tepe-teńdikti joǵaltpaı ózdiginen jyljı alatyn aqyldy motosıkldi tanystyrdy.

Al Hyundai kompanıasy pıltosyz avtonyń syrt kórinisimen tańǵaldyrýdy uıǵarǵan. Sebebi olar usynǵan Ioniq avtokóliginiń kádimgi kólikterden esh aıyrmashylyǵy joq. Sensorlardyń barlyǵy kólik shanaǵynyń ishine jasyrylǵan. Bul arqyly kárister bolashaqty anaǵurlym jyldam jaqyndata alatyndyǵyn dáleldegisi kelgendeı.

BMW kompanıasy bolsa HoloActive Touch ınterfeısiniń jańa júıesin kórsetti. Ol jaqyn bolashaqta kompanıa kólikterine ornatylmaq.

Elektrokólikter

CES 2017-tegi kólikterdiń ekinshi qatardaǵy trendi – elektrli kúsh qondyrǵysy. Bir sózben aıtqanda, elektrokarlar. Tesla óziniń paıda bolýymen álemdi ózgertip, elektrokólikterdiń shyndyqqa aınala alatynyna kóz jetkizdi. Sondyqtan endigi iri óndirýshiler ózindik elektrokólikter qurastyrýǵa belsene kirisken. Mysaly, Mercedes kórmege EQ jol talǵamaıtyn kóliginiń konseptisin alyp kelgen. Kompanıanyń sózinshe, bul kólik serıaly óndiriske daıyn jáne 2019 jyly satylymda paıda bolady. Avtokóliktiń kúsh qondyrǵysy men akýmýlátorlary bir zarádpen 500 kılometrdi eńserýine múmkindik beredi. Aıtpaqshy, «bir zarádpen júrý» tirkesine úırene bergeısiz, sebebi bul tirkes jaqyn kúnderi kúndelikti qoldanysqa ıe bolady.

Ony CES 2017 kórmesine Leaf. Nissan atalatyn elektrokólikterdiń jańa býynyn alyp kelgen Nissan kompanıasy da dáleldeıdi. Olar jańa Leaf-ti kórsetýmen shektelmeı, SAM— Seamless Autonomous Mobility erekshe ıntellektili júıesin tanytty. Japondyqtar pılotsyz avtolardy basqarý ortalyǵyn qurýdy josparlaýda. Óz kemelerin baqylaǵan NASA tárizdi, Nissan kompanıasy da ózindik pıltosyz avtolaryn baqylaýǵa almaq. Leaf-ke ornatylǵan SAM jasandy ıntellekti jol oqıǵalaryn ózdiginen sheshe alady. Biraq ári qaraıǵy áreketin boljaı almasa, basqarý ortalyǵymen baılanysady. Ol óz kezeginde ári qaraıǵy áreketterine nusqaý beredi. Jalpy, Nissan avtopılottardyń balamalylyǵyna qatysty máselelerdi sheshýge tyrysýda.

Al Ford kompanıasy ózindik jasandy ıntellekt jasaýmen bas qatyrǵysy kelmegen syńaıly. Olar Amazon usynǵan Alexa jasandy ıntellektiniń kómegine júgingen. Alexa-nyń kómegimen kólikte otyryp-aq úıińizdegi Philips Hue aqyldy shamyn jaǵa alasyz. Nemese avtokólik qozǵaltqyshyn qashyqtyqtan iske qosýyńyzǵa bolady. Dese de dál osy qyzmet túrlerin usyna alatyn smartfondar barda, mundaı jasandy ıntellektiniń ne qajeti bar ekendigin Ford kompanıasy túsindirmedi. Biraq kollabrasıa da qyzyǵýshylyq týdyrady. Sebebi búgingi kún Alexa AQSH-ta keń tanymaldyqqa ıe.

Faraday Future FF91

Barlyǵy avtopılot jáne aqyldy kómekshi qyzmeti ornatylǵan elektrokarlar jasaýǵa den qoıǵan tusta, Los-Andjelestik Faraday Future kompanıasy ónimderiniń shyndyqqa anaǵurlym jaqyn ekendigin kóre alamyz. Byltyr ótken CES kórmesinde FFZero1-nyń aqylǵa sıymsyz konseptisin alyp kelgen kompanıa bıylǵy jyly FF91 serıaly avtokóligin tanystyrdy. Ol bir zarádpen 608 km qashyqtyqty baǵyndyra alady. Sonymen qatar qýattandyratyn stansıalardyń kez-kelgen túrinen qýattanady. Faraday Future FF91 avtokóliginiń jıyntyq kúshtiligi – 1050 at kúshine teń. Bul avtokólik 2,39 sekýndta júzdegen jyldamdyqta júıtkıdi. Ol TeslaModel S-ten 0,01 sekýndqa jyldam. İlgeri deńgeıdegi avtopılot pen aqyldy kómekshiden bólek, kólik ishi júrgizýshige jáne jolaýshylarǵa arnalǵan túrli dıspleılermen, sensorlar júıesimen, kamera jáne Wi-Fi antenasymen jabdyqtalǵan. FF91 júrgizýshisiniń ózindik esep jazbasy bolady. Ol elektrokardyń jeke baptaýlaryn júkteýge múmkindik beredi. Bul zamanaýı kólikterdegi jady júıesiniń damyǵan túri. Faraday Future FF91 jasalýy 2018 jyly bastalady. Ázirge elektrokóliktiń quny belgisiz, biraq 5000 AQSH dollaryn tólep, osy kezden kezekke turýyńyzǵa bolady.

Faraday Future óziniń serıaly avtokólikterin avtokórmede emes, CES 2017 kórmesinde kórsetilimge shyǵarýy – olardyń kólik retinde emes, aldymen gadjettik maqsatta qoldanylatynyn ańǵartatyndaı.

---