InfoHub Logo

Profesor Sherýbaı Qurmanbaıuly qazaq tilin ǵylym tili retinde qalyptastyrýdyń mańyzdylyǵyn túsindirdi.

Ǵalymnyń aıtýynsha, búginde qazaq tili ǵylym men texnologıa salasynda keńinen qoldanylmaıdy. Qoǵam tarapynan oǵan degen qajettilik te tolyq týyndamaı otyr. "Nege? Birinshiden, qazaq tili ǵylym tili retinde ıadrolyq fızıkada, kıbernetıka, aqparattyq texnologıalar salasynda, energetıkada, medısına, qarjy salasynda qoldanylsa, suranys bolatyn edi. Máselen, Ulttyq bank pen qarjy mınıstrligi qazaqsha sóılep tursa, onda qarjy termınologıasynyń damýyna qajettilik te, negiz de qalyptasady. Mamandardy da izdeı bastaıdy. Al qazaq tili osy salalarda qoldanylmaıynsha qazaq tilindegi termınologıanyń ornyǵýyna biz negiz qalaı almaımyz. Osyny ashyq aıtýymyz kerek. Bul barlyq ǵylym salasyna baılanysty", - dedi Sh.Qurmanbaıuly Parlament Májilisinde ótken ǵylymı-praktıkalyq konferensıada. 

Onyń sózine qaraǵanda, keńester kezindegi saıasatqa baılanysty energetıka, texnıka, quqyq qorǵaý sıaqty kóptegen salalarda memlekettik tildiń qoldaný aıasy shekteldi. Sonyń saldarynan qazaq tili atalǵan salalarda ǵylym tili retinde órisin jaıyp kete almady. Atalǵan dástúr áli kúnge deıin jalǵasyp keledi. "Sosyn búginde termınderdi qalyptastyrýdyń ǵylymı qaǵıdattary áli aıqyn emes. Termınologıalyq jumystardy júrgizý kezinde belgili bir barshaǵa ortaq ustanymdar men qaǵıdattar basshylyqqa alyna bermeıdi, nemese olardy jaýapty qurylymdar men osy jumysqa jetekshilik etýshiler qalaýyna qaraı ózderi belgileıdi jáne jıi ózgertedi. Termınologıaǵa bulaı qaraý bul saladaǵy jumystyń jolǵa qoıylmaǵandyǵyn, isti ǵylymı, kásibı turǵydan tıisti deńgeıde júrgizilmeı otyrǵandyǵyn kórsetedi. Sonyń saldarynan turaqty qoldanylatyn ulttyq ǵylymı termınologıalyq qor tolyq qalyptaspaı otyr", - dep atap kórsetti Sh.Qurmanbaıuly.

---