InfoHub Logo

Qazaqstan men Túrkıa arasyndaǵy bilim berý salasyndaǵy ekijaqty yntymaqtastyqty damytý maqsatynda eki el Prezıdentteriniń tikeleı qoldaýymen qurylǵan «KATEV» halyqaralyq qoǵamdyq qory Qazaq-túrik lıseıleriniń ataýyn «Bilim-ınnovasıa lıseıi» dep ataý týraly usynys jasady.  

«Qor basshylyǵynyń (Qordyń Quryltaıshylar keńesi men Qordyń Ǵylymı-ádistemelik keńesi), QTL bilim alýshylarynyń ata-analar qaýymdastyǵy, lıseı dırektorlarynyń sheshimimen QTL ataýyna «rebrendıng» jasaý, ıaǵnı bilim berý uıymynyń qoǵamdaǵy orny men mártebesin jaıly jaıǵastyrý maqsatynda atyn aýystyrýdy, jáne de ony Qazaqstan Respýblıkasy Táýelsizdiginiń 25 jyldyq mereıtoıyna oraılastyryp, ataýyn «BİLİM-INNOVASIA LISEIİ» dep ózgertý týraly bastama kóterip otyr»,-dep habarlanǵan qordyń baspasóz qyzmeti taratqan aqparatta.

Qordyń  baspasóz qyzmeti taratqan aqparatqa súıensek, QR Premer-mınıstriniń orynbasary Imanǵalı Tasmaǵambetov Qordyń Qamqorshylyq keńesiniń tóraǵasy bolyp, al QR Bilim jáne ǵylym mınıstri Erlan Saǵadıev atalǵan keńestiń múshesi atanǵan eken.

Aıta keteıik, qazir «KATEV» HQQ basqarýynda 27 memlekettik qazaq-túrik lıseıi bar. Qor Qazaqstan Respýblıkasy Zańnamasyna, halyqaralyq normalarǵa, sondaı-aq, quryltaıshylar arasyndaǵy Jarǵy erejelerine sáıkes qyzmet atqarady. Qordyń quryltaıshylar quramy úsh adamnan turady, barlyǵy Qazaqstan Respýblıkasynyń azamattary.

Lıseı oqýshylarynyń 2015-2016 oqý jyly jetken jetistikteri:

Halyqaralyq pándik olımpıadalar - 129;

Halyqaralyq ǵylymı joba jarystary - 238;

Respýblıkalyq pándik olımpıada - 253

Respýblıkalyq ǵylymı joba jarystary - 62.

Al, aldyńǵy qatarly oqý oryndaryna túsý boıynsha 2015-2016 oqý jylynda QR JOO-yna (granttar) 821 túlek túsken. Nazarbaev Ýnıversıtetine - 148, TMD jáne alys shet elderdiń JOO - 267 bitirýshi qabyldanǵan.

Eske sala ketsek, Túrkıa prezıdenti Redjep Taıyp Erdoǵan atalǵan lıseılerdiń túrik dindary, oppozısıoner  Fethýlla Gúlenge tikeleı qatysy baryn aıtyp, prezıdent Nursultan Nazarbaevqa olardy jabýǵa keńes bergen bolatyn.

Óz kezeginde elbasy atalǵan oqý oryndaryna aýqymdy tekserýler júrgizetinin málimdegen.

---