InfoHub Logo

QR Bilim jáne ǵylym mınıstrligi orta bilim berý uıymdary úshin mindetti mektep formasyna qoıylatyn talaptardy bekitti, dep habarlaıdy zakon.kz, primeminister.kz bergen málimetke súıenip.

Qazaqstan Respýblıkasy Bilim jáne ǵylym mınıstriniń 2016 jylǵy 14 qańtardaǵy № 26 buıryǵyna sáıkes atalǵan talaptar «bilim berýdiń zaıyrly sıpatyn iske asyrýǵa jáne orta bilim berý uıymdary bilim alýshylarynyń arasynda áleýmettik, múliktik jáne basqa da ózgeshelikterdiń belgilerin joıýǵa baǵyttalǵan».

«Mektep formasynyń úlgisi, túsi klasıkalyq stılde, biryńǵaı tús gammasynda jasalady, úsheýden asyrmaı tústerdi aralastyrýǵa ruqsat etiledi. Mektep formasynyń túsi qalypty jáne ashyq emes tústerden tańdalady. Mektep formasy bilim alýshylardyń jas erekshelikterine qaraı engizilip, kúndelikti, merekelik jáne sporttyq bolyp bólinedi», - delingen qujatta.

Uldardyń mektep formasy: pıjak, jılet, shalbar, merekelik jeıde, kúndelikti jeıde (qysqy mezgilde: trıkotaj jılet, vodolazka). Uldarǵa arnalǵan shalbarlar erkin tigilgen jáne uzyndyǵy boıynsha tobyqty jaýyp turady.

Qyzdardyń mektep formasy: pıjak, jılet, ıýbka, shalbar, klasıkalyq jeıde (qysqy ýaqytta: trıkotaj jılet, sarafan, vodolazka). Qyzdarǵa arnalǵan shalbarlar erkin tigilgen jáne uzyndyǵy boıynsha tobyqty jaýyp turady.

Uldardyń merekelik formasy kúndelikti formaǵa qosymsha aq jeıdeden, qyzdar úshin aq tústi blýzkadan quralady.

Mektep formasyna klasıkalyq pishindegi mektep formasynyń negizgi túsine sáıkes nemese kereǵar keletin galstýk tigiledi.

«Mektep formasyna túrli konfesıalarǵa qatysty kıim elementterin qosýǵa bolmaıdy», - delingen habarlamada.

Mektep formasyna orta bilim berý uıymynyń erekshelik belgilerin (belgiler, tigispeler jáne t.b.) salýǵa bolady. Olar kıimniń nemese aksesýardyń (pıjak, jılet, galstýk) joǵarǵy bóliginde ornalasady.

Mektep formasyna qoıylatyn talaptar klımattyq jaǵdaı, oqý sabaqtarynyń ótkizilý orny jáne oqý ǵımaratyndaǵy temperatýralyq rejım eskerilip, iske asyrylady.

Sondaı-aq, jaraqattaıtyn fýrnıtýrasy bar kıim men aksesýarlar kıýge tyıym salynady.

Uldar men qyzdarǵa arnalǵan sporttyq forma sporttyq kostúmnen (sporttyq shalbar, kýrtka, fýtbolka), sporttyq aıaq kıimnen (krassovka, kedy) turady.

Mektep formasynyń matasy retinde qasıetteri jaqsartylǵan jartylaı jún jáne maqta, kıiske tózimdi, antıbakterıaldyq, antımıkrobtyq jáne antıstatıkalyq qasıetteri bar matalar qoldanylady.

Mektep formasynyń túsin, fasonyn tańdaýdy jáne ıýbkanyń uzyndyǵyn orta bilim berý uıymy men qoǵamdyq keńes aıyqyndaıdy, jalpymekteptik ata-analar jınalysynyń hattamasymen bekitiledi.

Oblystardyń, Astana jáne Almaty qalalarynyń bilim basqarmalary, aýdandyq (qalalyq) bilim bólimderi ata-analarǵa mektep formasyn otandyq mektep formasyn shyǵaratyn óndirýshilerden satyp alýdy usynady, biraq olardy naqty óndirýshilerden satyp alýdy mindettemeıdi nemese oqý ornynda forma satýdy uıymdastyrmaıdy.

Mektep basshysy aǵymdaǵy jylǵy 25 mamyrǵa deıin mektep formasynyń bekitilýin qamtamasyz etedi. Bilim alýshylardyń mektep formasyn saqtaýy máselesin qoǵamdyq keńestiń talqylaýyna shyǵarylady. Basshy osy talaptarmen ata-analardy nemese zańdy ókilderdi bilim alýshyny bilim berý uıymyna qabyldaý týraly ótinish (erkin nysanda) berý kezinde qol qoıǵyzý arqyly jáne jalpy mekteptik ata-analar jınalysynda tanystyrady.

Buıryqqa sáıkes ata-analar men ózge de zańdy ókilder mektep formasy týraly máselelerdi talqylaýǵa qatysady jáne ony jetildirý boıynsha usynys engizedi, ony kez kelgen saýda jelisinen satyp alady.

---