InfoHub Logo

Qazaqstanda ótken 2 jylda 39 IT-lıseı ashyldy. Búginde bul bilim ordalarynda 55 myńǵa jýyq oqýshy bilim alyp jatyr.

IT-lıseıler jańa modıfıkasıalyq úlgidegi kabınettermen jáne zamanaýı IT quraldarmen jabdyqtalǵan. Balalar úshin aqparattyq-kommýnıkasıalyq tehnologıalardy tereń zertteýge baǵyttalǵan arnaıy bilim berý baǵdarlamalary ázirlendi.

Atalǵan bilim berý baǵdarlamalarymen 7-11 synyp oqýshylary qamtylǵan. Mamandandyrylǵan IT lıseılerde oqýǵa nıet bildirgen bilim alýshylar túsý emtıhandaryn tapsyrady.

Oqýshylar baǵdarlamalaý daǵdylary, 3D dızaın, robototehnıka jáne basqa da baǵyttar boıynsha bilim alady.

Osyndaı lıseılerdiń ashylýy, jańa bilim berý baǵdarlamalaryn engizý, sondaı-aq pedagogterdiń qoldaýynyń nátıjesinde IT-lıseılerdegi bilim alýshylar sıfrlyq startaptar quryp, óz jobalaryn ázirlep jatyr. Sonymen birge Qazaqstandy álemdik arenada laıyqty deńgeıde tanytyp keledi.

Mysaly, Kókshetaý qalasyndaǵy IT-lıseıdiń oqýshysy Caspian Start-UP 2021 Halyqaralyq ǵylymı jobalar baıqaýynda jeńiske jetti. Baıqaýǵa Kaspıı mańy elderinen 90-ǵa jýyq oqýshy men kolej stýdentteri qatysty. Jas daryn ıeleri ınovasıalyq tehnologıalar salasyndaǵy ózderiniń avtorlyq jobalaryn tanystyrdy.

«Elimizde osyndaı mamandandyrylǵan IT-lıseılerdiń ashylǵanyna qýanyshtymyn. Nátıjesinde biz barlyq sıfrlyq tehnologıany sapaly túrde zertteımiz. Máselen, men startaptar baıqaýynda ózimniń avtorlyq jobamdy tanystyrdym. Maǵan kómektesken muǵalimderim men ǵylymı jetekshime alǵysym sheksiz. Qol jetkizgen jetistikterim laıyqty baǵalanyp, bilim berý grantyn alǵanyma qýanyshtymyn», – dedi Caspian Start-UP 2021 jeńimpazy Asylhan Qoshanov.

---