InfoHub Logo

Qazirgi zamanǵy sabaqqa qoıylatyn talaptar.

Álemde, elimizde, qoǵamda bolyp jatqan ózgerister Qazaqstan Respýblıkasynda Bilim berýdi damytýdyń 2011 - 2020 jyldarǵa Memlekettik baǵdarlamasy talaptarynyń sheńberinde bilim mazmunyn modernızasıalaý: jańa perspektıvalar, jańa múmkindikter baǵdarlamasyn iske asyrý qazirgi zamanǵy muǵalimge jańa talaptar qoıady.

Qazirgi zaman muǵalimi qandaı bolýy kerek? Álbette, bul suraqqa birden jaýap berý qıyn. Menińshe, bul shyǵarmashylyq qabiletterdi damytý úshin jaǵdaılar jasap, oqýshylardyń boıynda bilimdi shyǵarmashylyqpen qabyldaýǵa umtylysty damyta alatyn, olardy derbes oılaýǵa, materıaldy zerdeleý prosesinde ózine qoıatyn suraqtardy derbes tujyrymdaýǵa úıretetin, olardyń qajettilikterin tolyǵyraq iske asyratyn, pánderdi zerdeleýge túrtkini arttyratyn, olardyń jeke beıimdikteri men daryn nyshandaryn ushtaı alatyn, yntalandyra alatyn adam.

Olaı bolsa, oqýshynyń tanymdyq áreketin damytý degenimiz - bilimdi meńgerýdi baıqaý, sezý arqyly ǵana emes, kerisinshe, taldanyp otyrǵan prosesti naqty ańǵartý arqyly, meńgergen bilimin praktıkada shyǵarmashylyqpen qoldana bilýdiń durys tásilderin úıretý, sol arqyly sheberligi men daǵdysyn arttyrý. Mundaı kúrdeli oı - órisiniń júıeli qalyptasýynda oqýshyny bilimdi shyǵarmashylyqpen ıgerýge talaptandyratyn, onyń amal, tásilderin úıretetin, mekteptegi basty tulǵa - muǵalim. Solaı bolǵanmen muǵalimniń áreketi óz oqýshylarynyń tarapynan qoldaý tapqanda ǵana sabaq nátıjeli bolmaq. Qazirgi zamanǵy muǵalim - bul kásibı maman. Pedagogtyń kásibıligi onyń kásibı jaramdylyǵymen, kásibı jol tabýymen, derbes damýymen, ıaǵnı óz boıynda kásibı qyzmetti oryndaý úshin qajetti qasıetterdi maqsatty túrde qalyptastyrýymen anyqtalady.

Qazirgi zamanǵy pedagogtyń, aıryqsha sheberlik belgileri:
• udaıy ózin - ózi jetildirý;
• ózine - ózi syn turǵysynan qaraý;
• bilimdarlyq jáne joǵary eńbek mádenıeti bolyp tabylady. Muǵalimniń kásibı ósýi ózdiginen, bilim alý qajettiliginsiz múmkin emes.
Qazirgi zamanǵy muǵalim úshin eshqashan da qol jetken mejede qalyp qoımaı, qaıtkende de alǵa qaraı umtylýy óte mańyzdy. Óıtkeni muǵalim eńbegi - sheksiz shyǵarmashylyq úshin sarqylmas qaınar, sondyqtan qazirgi zaman muǵalimderinen izdený men jańa tehnologıalardy meılinshe keńinen qoldaný qajettiligi týyndap otyr.

Sabaq - bul logıkalyq aıaqtalǵan, birtutas, anyqtalǵan sheńberde shektelgen oqý - tárbıelik úderistiń kesindisi. Onda oqý úderisiniń negizgi elementteri: maqsattary, mindetteri, túrleri, quraldary, muǵalim men oqýshynyń qarym - qatynas iskerligi tyǵyz baılanysta bolady.
Sabaq sapaly ótý úshin, onyń jospary durys qurylýy qajet.

Sabaqtyń negizgi komponentteri
• 1. Uıymdastyrýshylyq - sabaq boıy synypty uıymdastyrý, oqýshylardyń sabaqqa daıyndyǵy, tártip.
• 2. Maqsattylyq - oqýshylar aldyna sabaq maqsaty men onyń jeke kezeńderiniń maqsatyn qoıý.
• 3. Yntalandyrýshylyq – oqylatyn oqý materıalynyń berilgen taqyryp boıynsha da, jalpy kýrs boıynsha da mańyzdylyǵyn anyqtaý.
• 4. Komýnıkatıvtilik – muǵalimniń synyppen qarym - qatynas deńgeıi.
• 5. Mazmundyq – oqylatyn, bekitiletin, qaıtalanatyn, ózindik jumystar jáne t. s. s. materıaldardy tańdaý.