InfoHub Logo

Sońǵy on jylda shaǵyn úıler trendi kún ótken saıyn tanymal bolyp keledi.  Qalalyq kishkentaı úılerdiń jańa ǵasyry jetti.Kútpegen jerden usynylǵan shaǵyn úıdiń nusqasyn James Law Cybertecture kompanıasy jasaǵan. House OPOD Tube House - standartty beton qubyrynan jasalǵan. Ol álemdik megapolısterde turǵyn úı satyp alýǵa shamasy jete bermeıtin jastarǵa arnalyp otyr.

Jýyrda ǵana Gonkongte usynylǵan úıler buryn qoldanysta bolǵan dıametri 2,5 metr beton sý qubyrlarynan jasalǵan. Turǵyn úı bir nemese eki adamǵa arnalǵan, onyń aýdany shamamen 9,3 sharshy metrdi quraıdy. Úıdiń ishine barlyq jaǵdaı jasalǵan. Iaǵnı, jınalmaly kereýeti bar qonaq bólme, shaǵyn tońazytqysh, jýynatyn bólme, kıim men jeke zattardy qoıýǵa arnalǵan oryn.

Joba sáýletshisi Djeıms Loýdyń aıtýynsha, sý qubyrlaryndaǵy shaǵyn úıler ıdeıasy tek jastardyń turǵyn úımen qamtamasyz etilýin ǵana emes, sonymen qatar, qalalyq bılik ókilderiniń halyq tyǵyzdyǵymen kúresý máselesine de tıisti núkte qoıýyna kómekteseri anyq.

Atalǵan úı konstrýksıasy asa jeńil bolmaǵanymen – árbir qubyr 22 tonna shamasynda, olardy ornatý úshin az kúsh jumsalady jáne kóp qarajatty qajet etpeıdi. Sebebi qubyrlar bir-birine ońaı jabystyrylady, sol sebepti olardy ornatý asa qymbat shyǵynǵa aparmaıdy eken.

---