InfoHub Logo

Bir kúni Qoja Temirdiń saraıyna keledi. Patsha Qojany jaman atqa mingizip alyp, ańǵa erte júredi. Bular ańda júrgen de, qatty jaýyn jaýyp, Temir men nókerleri attaryn borbaılap, úı qaıdasyń dep tartyp turady da, Qoja olarǵa ilese almaı, jaýynnyń astynda jalǵyz qala beredi. Basqa ister amaly bolmaǵan Qoja, tyrdaı jalańash sheshinip, bar kıimin astyna basyp alady. Jaýyn basylǵan soń kıimin qaıtadan kıip, ústi-basy qup-qurǵaq bolyp úıge keledi. Muny kórgen patsha, ań-tań bolyp Qojadan mánisin suraıdy.

Sonda Qoja:

— Astynda sáıgúlik aty bar adam, jaýynnyń astynda qala ma eken? Jaýyn sebeleı bastaǵanda-aq, taqymymdy bir qysyp qalyp edim, qustaı ushyp, jaýyn-jaýynnyń arasymen kózdi ashyp-jumǵansha úıge alyp keldi, — deıdi.

Patsha ámir etip, Qoja minip kelgen atty óziniń at qorasyna qoıdyrady.

Birde taǵy da ańǵa shyǵady. Bul joly patsha álgi atqa ózi minedi. Taǵy da nóser jaýyp, ańshylar úıge bet alǵanda, Qoja men nókerler ozyp ketedi de, patsha shaban atpen úıge jetkenshe malmandaı bolady. Patsha erteńinde Qojany shaqyryp alyp:

— Ótirik aıtqandaı ne kún týdy basyńa? Saǵan senem dep sýǵa malshyndym, — dep jazǵyrsa kerek.

Sonda Qoja:

— «Handa qyryq kisiniń aqyly bolady» degen qaıda? Men qusap kıimińdi sheship, astyńa basyp alyp, jaýyn basylǵan soń kıseń, ústi-basyń sý bolmaı, qup-qurǵaq keler ediń, — depti.

---