InfoHub Logo

Bir kúni Qoja aı jaryǵynda eki qolyn eki jaqqa sozyp jiberip, baqsha ishinde shaljıyp turǵan bir úlken adamdy kóredi. Jalma-jan áıelin oıatyp:

— Tezirek sadaq pen oq áper, — dep dybystaıdy. Allasyna syıynyp, Qoja sadaqtyń adyrnasyn shirene tartyp, atyp jiberedi. Oq dál qarynnan baryp tıedi.

— Oınaıtyn adamyn tapqan eken bálem, — dep Qoja bir qorazdanyp qoıady. — Qazir tıispeı-aq qoıaıyq, tań atqansha jany jahannamǵa da keter.

Qoja osyny aıtady da, úıine kelip, esikti ishten myqtap bekitip alyp, uıyqtap qalady. Tańerteń baqshaǵa kirse, túnde atqany óziniń shapany eken. Áıeli keshke jaqyn jýyp, tań atqansha keýip qalsyn dep ilip qoısa kerek. Oq dál kindiktiń tusynan tıip, shapannyń dal-dulyn shyǵaryp ketipti, Qoja etpetinen jata qap, Táńirge jalbaryna bastaıdy:

— O, jasaǵan, aman saqtaǵanyńa myń shúkirshilik.

Osy kezde qasyna áıeli kelip:

— Ne boldy? Jasaǵanǵa ne dep jalbarynyp jatyrsyń? — dep suraıdy.

Sonda Qoja:

— Óı, aqymaq shirkin, kórmeı turmysyń, oqtyń qaıda tıgenin? Sol kezde shapan ústimde bolsa, men qaıter edim? — dep búktisip, oq tıgenge ishi aýyryp jatqandaı, bir qolymen ishin basyp alyp, Jaratqanǵa taǵy da jalbarynsa kerek.

---