InfoHub Logo

Qojanasyr jarly bolǵan adam eken. Bir kúni jaıaý kire tasyp, kásip qylyp, tamaq asyramaq boldy. Bazarǵa kelip, jaıaý kireshilerdiń janynda tursa, bir myrza kelip, dúkennen jańa satyp alynǵan bir sandyq kese, shynyaıaq, tas-tabaq sıaqty as ishetin ydystardy úıine jetkizip berýdi suraıdy.

— Úıińizge alyp barý aqysyna ne beresiz? — deıdi Qojanasyr.

— Alyp barý aqyńa men saǵan úsh aýyz bek maǵynaly, qasıetti sóz úıretemin, — deıdi myrza.

«Aqsha basqalardan da tabylady ǵoı! Munyń bek qasıetti, zor maǵynaly sózin esitip qalaıyn» degen oımen Qojanasyr:

— Jaraıdy, — deıdi.

Qoja aýyr sandyqty kóterip, ıesine erip kele jatyp biraz jer júrgen soń: «Káne, myrza, qasıetti, maǵynaly sózińizdi aıtsańyz eken», — deıdi Qojanasyr. Jaldaýshy aıtady:

— Birinshi sóz mynaý: egerde bireý ashtyq toqtyqtan jaqsy dese, eshýaqytta nanbaǵaısyń!

— Jaqsy, bul bek maǵynaly sóz eken, — deıdi Qojanasyr.

Taǵy biraz júrgen soń:

— Endi ekinshi sóz mynaý: attan jaıaý júrý janǵa tynysh dese, eshýaqytta nanbaǵaısyń, — deıdi myrza.

— Bu da zor maǵynaly sóz eken, — deıdi Qojanasyr.

Úıdiń janyna kelip turyp qaqpaǵa kirerdiń aldynda:

— Myrza, endi úshinshi sózińdi aıtsań eken, — deıdi Qojanasyr.

— Úshinshi sózim: egerde jaıaý kireshiniń senen aqylsyzdyraǵy bar deýshi bolsa, oǵan da nanbaǵaısyń! — deıdi myrza.

Sonda Qojanasyr tóbesindegi sandyqty jerge tastap jiberip:

— Egerde bireý bu sandyqtyń ishinde synbaı qalǵan nárse bar dese, sen de eshýaqytta nanbaǵaısyń! — dep qaıtyp júre bergen eken.

---