InfoHub Logo

QR Bilim jáne ǵylym mınıstrligi «KTK» telearnasynyń efırinde kórsetilgen Almatyda ótip jatqan aǵylshyn tili kýrstaryna el aımaqtarynan kelgen 500 ustazǵa tıesili shákirtaqylardyń tólenbeýine qatysty sújetke pikir bildirdi.

Mınıstrlikten málim etkendeı, olar 2016-2019 jyldarǵa arnalǵan Memlekettik bilim salasyn damytý baǵdarlamasy aıasynda uıymdastyrylyp, ótkizilip jatqan kýrstardyń tyńdaýshylary - pedagogıkalyq JOO muǵalimderi. 2021 jyldan bastap qazaqstandyq JOO-lar aǵylshyn tilin jetik biletin mamandardy daıarlaýdy bastamaq. Joǵary oqý oryndaryna keletin abıtýrıentterdiń aǵylshyn tilin meńgerip, JOO baǵdarlamalaryna jeńil kirigýi úshin 2019 jyldan bastap 10-11-inshi synyp oqýshylary 4 pánniń arasynan (hımıa, fızıka, bıologıa, ınformatıka) ekeýin tańdap, aǵylshynsha oqıdy.

Osy maqsatta Bilim jáne ǵylym mınıstrligi mektepterdiń pán muǵalimderi men pedagogıkalyq JOO ustazdaryna arnalǵan aǵylshyn tili kýrstaryn uıymdastyryp otyr. 

«Qazir til oqytý kýrstarynan pedagogıkalyq JOO-nyń 1500 ustazy ótip jatyr. Kýrstar pánder men bilim baǵdarlamalaryn aǵylshyn tilinde oqytýdy 2008 jyldan beri júrgizip kele jatqan  4 JOO-da - Abaı atyndaǵy QazUPÝ, Ál-Farabı atyndaǵy QazUÝ, Abylaı han atyndaǵy QazHQjÁT jáne E.Bóketov atyndaǵy QarMÝ bazalarynda  ótkizilýde. Kýrstardyń basty baǵyty - aǵylshyn tili men pánderdi aǵylshyn tilinde oqytý úshin tildik biliktilikti joǵarylatý. Bul is kommýnıkatıvtik metodıkaǵa súıenip, Content and Language Integrated Learning  (CLIL) kontenttik oqytýdyń halyqaralyq praktıkasyna saı júrgizilip jatyr. Nátıjesinde, ustazdar óz pánderi aıasyndaǵy aǵylshyn tili bilimderin, eń az degende, bir deńgeıge kóteretindigine senimdimiz», - deıdi QR BǴM Joǵary jáne joǵary oqý ornynan keıingi bilim departamentiniń  dırektory Darhan Ahmed-Zákı.

Málim etilgendeı, kýrstarǵa qatysatyn ustazdardyń JOO-lardaǵy eńbekaqylary saqtalyp, shákirtaqylar tólenetin bolady.

«Sol stıpendıalar búgingi kúni tólenbeı turǵany anyqtaldy. Elimizde til úıretý kýrstaryn uıymdastyrý jańadan ıgerilip jatqan is bolǵandyqtan, ony uıymdastyrý barysynda barlyq jaǵdaıattardy eskerýge tyrystyq. Degenmen, is júzinde keıbir olqylyqtardyń oryn alǵanyn kórip otyrmyz. Qazir kýrs tyńdaýshylaryna tıesili stıpendıalardyń tólenýi úshin barlyq qajetti sharalar qolǵa alynyp, muǵalimderdiń aldyndaǵy bereshek osy aptanyń sońyna deıin tolyqtaı óteledi. Bul másele mınıstrliktiń qadaǵalaýyna alynyp otyr», - delingen mınıstrlik habarlamasynda.

Eske salaıyq, Almatyǵa óz bilimderin jetildirýge kelgen aǵylshyn tiliniń ustazdary shákirtaqylarynyń tólenbeýinen páter jaldaýǵa jáne tamaqtanýǵa aqshalary joqtyǵyn aıtyp, shý shyǵarǵan bolatyn.

---