InfoHub Logo

QR Bilim jáne ǵylym mınıstrligi 2016 jyldyń 1 qyrkúıeginde H.Dosmuhamedov atyndaǵy Atyraý memlekettik ýnıversıtetiniń, İ.Jansúgirov atyndaǵy Jetisý memlekettik ýnıversıtetiniń, Pavlodar jáne Qostanaı memlekettik pedagogıkalyq ınstıtýttarynyń rektorlary laýazymdaryna konkýrs jarıalady, dep habarlady www.24.kz.

JOO-larda korporatıvtik basqarýdyń tolyqqandy qaǵıdattaryn endirý jáne bul máseleni talqylaýǵa jurtshylyqty keńinen tartý jumysy aıasynda bilim ordalarynyń rektorlaryn saılaý jónindegi ashyq konkýrs alǵashqy ret ótkizilmek.

JOO rektorlyǵyna úmitkerlerdi irikteý jáne taǵaıyndaý tártibi «Memlekettik kásiporynnyń basshysyn taǵaıyndaý jáne atestattaý, sondaı-aq onyń kandıdatýrasyn kelisý qaǵıdalaryn bekitý týraly» erejelerdiń 4-1 taraýyna sáıkes júrgiziledi.

Konkýrsqa qatysý úshin qajetti qujattar «Egemen Qazaqstan» jáne «Kazahstanskaıa pravda» gazetterinde, sondaı-aq www.edu.gov.kz QR BǴM saıtynda árbir JOO boıynsha bólek-bólek jarıalanǵan kúnnen bastap 21 (jıyrma bir) kúntizbelik kún boıy qabyldanady.

Konkýrsqa qatysýshy úmitkerlerge qoıylatyn talaptar: joǵary bilim, basqarý laýazymdaryndaǵy eńbek ótili 5 jyldan kem bolmaýy tıis.

Konkýrsqa qatysýshy tıisti qujattarmen birge onyń bilimi, eńbek ótili, kásibı biliktiliginiń deńgeıin rastaıtyn qujattar (biliktiligin arttyrýdan ótkendigi, ǵylymı dáreje men ataq alý jónindegi qujattardyń kóshirmeleri,  sondaı-aq aldyńǵy jumys ornynan minezdeme hat j.s.s.) usynýy tıis.

Úmitkerler belgilengen qujattardan bólek JOO-nyń damytý baǵdarlamasyn usynýlary shart. Olardy JOO-nyń Baqylaý keńesi 25 kúnge deıingi merzim ishinde qarastyrady. Osy ýaqytta jurtshylyqpen talqylaý maqsatynda JOO-nyń damytý baǵdarlamalary jergilikti aımaqtyq BAQ-da jáne bilim ordalarynyń aqparattyq stendterinde jarıalanady.

---