InfoHub Logo

QR Prezıdenti - Elbasy N.Á.Nazarbaevtyń «Qazaqstan-2050» strategıasy

Elbasymyz N.Á.Nazarbaev Qazaqstan halqyna arnalǵan dástúrli joldaýyn táýelsizdik kúni qarsańynda jarıa etti. «Qazaqstan-2050» strategıasy qalyptasqan memlekettiń jańa saıası baǵyty» dep ataldy. Elbasymyzdyń bıylǵy joldaýynda aldymen memleketimizdiń, ulttyq ekonomıkamyzdyń, azamattyq qoǵamymyzdyń, qoǵamdyq kelisimimizdiń, óńirlik kóshbasshylyǵymyz ben halyqaralyq bedelimizdiń daǵdarysta synalýy sóz boldy.

Elimizdiń 21 jylda aıtarlyqtaı jetken jetistikterimiz saralanyp, álem aldyndaǵy bedelimizdiń asqaqtaǵany aıqyndaldy. Qýatty da tabysty memleketimizdiń demokratıalandyrý men yryqtandyrýdyń ornyqty prosesi, túrli áleýmettik etnostyq jáne dinı toptardyń kelisimi men tatýlyǵy, halyqaralyq eńbek bólinisindegi bizdiń rolimiz, qoǵamdyq turaqtylyq pen kelisimdi qamtamasyz etetin kúshti áleýmettik saıasat ustanǵan álemdik qoǵamdastyq tanyǵan el ekenimiz, ıadrolyq qarýdy taratpaý rejimin ilgeriletýdegi bizdiń belsendi rólimiz ben 1997 jylǵy joldanǵan «Qazaqstan – 2030» strategıasynyń 15 jyl ishinde maqsat mindetteriniń oryndalýy qorytyndylandy.

Sonymen qatar aldaǵy HHİ ǵasyrdyń jahandyq on - syn qateri dep: – tarıhı ýaqyttyń jedeldeýi, jahandyq demografıalyq teńgerimsizdik, jahandyq azyq-túlik qaýipsizdigine tónetin qater, sýdyń tym tapshylyǵy, jahandyq energetıkalyq qaýipsizdik, tabıǵı resýrstardyń sarqylýy, úshinshi ındýstrıalyq revolúsıa, údeı túsken áleýmettik turaqsyzdyq, órkenıetimiz qundylyqtarymyzdyń daǵdarysy, jańa álemdik turaqsyzdyq qaýpin atap ótti.

Prezıdent Qazaqstannyń qazirgi zamanǵy osy atalǵan syn-qaterlerge jaýap retinde damýdyń 2050 jylǵa deıingi kezeńine arnalǵan Strategıany qabyldady.
Jahandyq ekonomıkanyń kindigi Azıa-Tynyq muhıty óńirine jedel aýysyp barady, dep jalǵastyrdy óziniń sózin Prezıdent. Búginde biz «Qazaqstan -2030» Strategıasyn qabyldaǵan sátten múldem basqa jaǵdaı men múmkindikterde ómir súrip otyrmyz. 2050 – bul qazirgi kezde álemdik qoǵamdastyq baǵyt ustanyp otyrǵan naqty merzim. Bizdiń naqty maqsatymyz – 2050 jylǵa qaraı álemniń asa damyǵan 30 memleketiniń qataryna qosylý, dep atap ótti Qazaqstan basshysy.
Bul úshin bizde barlyq múmkindikter: resýrstar, bilimdi adamdar, judyryqtaı jumylǵan ult bar, dedi Elbasymyz.

Elbasymyzdyń sózine qaraǵanda, osydan 15 jyl buryn qabyldanǵan 2030 Strategıasy keńestik kezeńnen keıingi retsizdik túpkilikti eskerilmegen, Ońtústik-SHyǵys Azıa elderi men keıbir ózge de rynoktardy daǵdarys qaltyratyp turǵan shaqta qabyldanǵan bolatyn. Soǵan qaramastan, Qazaqstan 2012 jyly İJÓ kólemi boıynsha planetamyzdaǵy damyǵan 50 eldiń qataryna kiredi.

El basshysy óz sózin «Biz bárimiz bir atanyń - qazaq halqynyń ulymyz. Bárimizdiń de týǵan jerimiz bireý - qasıetti qazaq dalasy. Bul dúnıede bizdiń bir ǵana Otanymyz bar, ol – táýelsiz Qazaqstan. Biz bolashaqqa kóz tigip, táýelsiz elimizdi «Máńgilik El» etýdi murat qyldyq. «Qazaqstan-2050» Strategıasy osynaý máńgilik joldaǵy býyndar birliginiń, urpaqtar sabaqtastyǵynyń kórinisi. Babalardyń erligi, búgingi býynnyń eren isteri jáne jas urpaqtyń jasampazdyǵy arasynda sabaqtastyq bolsa ǵana, biz «Máńgilik El» bolamyz» dep qorytyndylady.