InfoHub Logo

Eki qap kúzem júndi teńdep, balasyn aldyna alǵan áıel bir shaldan ótkel suraǵan eken, shal áıeldi el qoı ótkizgen júzbeniń aldyna ertip kelip:

— Qaraǵym, ótkel degen osy. Qoıdyń qabyrǵasynan, úırektiń moınynan-aq keledi, attyń basyn tartpa, — depti.

Saqaldy adam bolǵan soń áıel senip «táýekel» dep sýǵa qoıyp ketse, esik pen tórdeı jerge barmaı aǵyn ilip ala jónelipti, bir táýiri, aty jylqynyń jel qaıyǵy eken, aman-esen ar jaqqa alyp shyǵypty. Yzaǵa býlyqqan áıel atynyń basyn buryp:

— Mende ala almaı júrgen ne kegiń bar edi, Qudaıdyń ajalynan buryn óltire jazdadyń-aý, — dep ursyp tursa, menen taǵy da jol surap tur ǵoı dep joramal jasaǵan sańyraý shal:

— Kishkene joǵary qyryndaı júrseń, qara jol aıqasa ketedi, shý-shýge salyp, sonymen aıdaı berseń, atam aýylynyń qystaýyna ózi-aq alyp barady, — dep aıǵaılap qala beripti.

---