InfoHub Logo

Sarttardy birneshe ret Esenkeldi, Sarjan, Erjan shaýyp kemshilik keltire bergen soń, sarttar ádeıi kisi jiberedi. «Biz qaralyq, balalaryn jibersin, sóılesip eki aramyzdy jalǵastyryp turalyq», — dep. Qasym Esenkeldi, Sarjandy, Erjandy jıyrma kisimen jiberedi.

Bulardyń ishinde Aǵybaı on toǵyz jasta, júr demese de, birge júredi. Sarttardyń shaqyrǵan jerine barǵanda, bulardy qurmetpen alyp syılaı bastaıdy. Sarttardyń daıashysynyń biri qazaq eken, árdaıym kelgende Aǵybaıdyń eki kózi sonda bolady. Jigitke Aǵybaı sóıleseıin dese, sarttardyń kózinshe sóılese almaıdy. Tórtinshi kúni tamaqty kesh bere bastaıdy. Bir retin taýyp qazaq jigit ısharatpen «búgin óltiredi» depti. Sonda Aǵybaı: «Menim atym ana júrgen, onyń qasynda Qyzylaýyz, boz ekeýin daıynda», — degende, jigit basyn ızep «jaraıdy» dep júre beredi. Aǵybaı tórelerdiń qasyna kelip, ısharatpen óltiretinin sezdiredi. Keshki tamaq kelgende, tóreler jeı almaıdy, sonda Aǵybaı tabaqtardy aldyna alyp: «ólsem — ataýym, ólmesem — jol azyǵym», — dep bárin jep qoıypty. Tabaqtaryn jıyp alǵan soń, sarttar tórde otyrǵan tórelerdi birtindep shyǵaryp alyp baýyzdaı bastaıdy. Besinshi retinde, qazaq jigiti Aǵybaıdyń betine qarap «daıyn» degen ısharat kórsetedi. Altynshy retinde, qazaq jigiti esebin taýyp shyǵaryp, Aǵybaı óz atyna minip Qyzylaýyz atty jetektep qashyp, sonan kelip Qasymǵa habar bergen.

 

---