InfoHub Logo

Ertede quralaıdy kózden atatyn bir ańshy bolypty. Táńiriniń buıyrtqan nesibesin túzden terip jep, ań aýlap kún kóredi eken.

Kúnderdiń bir kúninde saǵym shalǵan sary dalada ózegi talyp, ókpesi óship ań aýlap kele jatsa, betegeli belde jaıylyp júrgen jalǵyz shubar kıikti kóredi. Iis shaldyrmaý úshin yq jaǵyn alyp, saıdy jaldap, betkeıdi quldap, sadaq tartym jerge keledi. Baspalap qarasa, jelini jer syzǵan eshki eken. Ań degen kózdiń qurty, ańshy sol jerde «sende jazyq joq, mende azyq joq» dep, sadaǵyn kezenedi.

«Túz taǵysy tabıǵatpen tildes» degen emes pe, bir qaterdiń tóngenin sezgen shubar kıik selt etip basyn kóterse, sadaǵyn kezep turǵan sur mergendi kóredi. Oqtan júırik emes, endi qashyp qutylmasyn bilgen shubar kıik kózi móldirep ańshyǵa qaraıdy da, jalbaryna til qatady.

— Eı, Surmergen, janyma saýǵa suraımyn. Áli baýyr kóterip úlgermegen egiz laǵym bar edi. Sol panasyz laqtarymdy ańsap, júregim eljirep, jelinim dertip kelemin. Meni atpa. Tilimdi alsań, «atqan oǵyń jerge túspesin» dep batamdy berer edim. Sonda sen ushqan qus pen júgirgen ańdy qutqarmas nesibeli ańshy bolasyń. Óle-ólgenshe taryqpaı ótesiń! Janyma saýǵa suraımyn, atpa! — deıdi.

Ańshy bul sózdi tyńdamaıdy. Kúnimen tabanynan taýsylyp, dala kezgen ańshy bul kıikten aıyrylsa, úıine qur qol baratyndaı bolady da, sadaǵyn tartyp jiberedi. Sonda kıeli kıik ańshynyń kóz aldyna shubar tasqa aınalypty deıdi.

Osydan keıin Surmergenniń joly bolmaıtyn bolypty.

Bul oqıǵany estigen dombyrashy «Shubar kıik» dep kúı tartqan eken.

---