InfoHub Logo

Almatyda Abaı atyndaǵy QazUPÝ janyndaǵy Sorbonna-Qazaqstan ınstıtýtynda 2015-2017 jyldary bilim alǵan 22 magıstrantqa «Sorbonna Parıj Sıte» birlestiginiń músheleri - Ýnıversıtetteriniń dıplomy tapsyryldy. Magıstranttar qosdıplomdyq bilim berý baǵdarlamasy boıynsha biliktilik alyp shyqty.

Saltanatty sharaǵa Qazaqstandaǵy Fransıanyń Tótenshe jáne Ókiletti Elshisi Fılıpp Martıne, Parıj-Dıdro ýnıversıtetiniń halyqaralyq yntymaqtastyq máseleleri jónindegi vıse-prezıdenti Antýan Kaze, Shyǵys tilderi jáne órkenıetteri ulttyq ınstıtýtynyń (INALCO) halyqaralyq yntymaqtastyq máseleleri jónindegi vıse-prezıdenti Ann Grınberg, «QR Tuńǵysh Prezıdenti - Elbasy» qorynyń atqarýshy dırektorynyń orynbasary Igor Rogov, Abaı atyndaǵy QazUPÝ-dyń birinshi prorektory Maqtaǵalı Bektemesov, Abaı atyndaǵy QazUPÝ-dyń ǵylymı jumys jáne halyqaralyq yntymaqtastyq jónindegi prorektory Aqtolqyn Qulsarıeva, Sorbonna-Qazaqstan ınstıtýtynyń teń dırektorlary Gúlmıra Nýrlıhına, Marı-Ann Serv qatysty.

Abaı atyndaǵy QazUPÝ-dyń birinshi prorektory Maqtaǵalı Bektemesov Sorbonna-Qazaqstan ınstıtýty halyqaralyq jobasynyń jáne qosdıplomdyq qazaqstan-fransýz baǵdarlamasynyń mańyzdylyǵyna toqtalyp ótti.

Qazaqstandaǵy Fransıanyń Tótenshe jáne Ókiletti Elshisi Fılıpp Martıne túlekterdi quttyqtap, qazaq-fransýz yntymaqtastyǵyndaǵy bilim berý jáne ǵylym salalaryn damytýǵa qosqan úlesteri úshin ýnıversıtet basshylyǵyna jáne Sorbonna-Qazaqstan ınstıtýtynyń ustazdaryna alǵysyn bildirdi.

«Sorbonna-Qazaqstan ınstıtýtynda bizdiń bolashaǵymyz qurylýda. Qazirgi tańda Fransıa - bilim berý salasy boıynsha álemde aldyńǵy qatardaǵy el jáne startaptar men ınovasıalyq texnologıalar eli. Fransıada eń úlken bıznes-ınkýbator ornalasqan. Fransıa men Qazaqstan strategıalyq áriptestikti damytý baǵytynda elimizde bilim alatyn qazaqstandyq stýdentter sanyn kóbeıtý kerekpiz. Osy maqsatta biz QR Bilim jáne ǵylym mınıstri Erlan Saǵadıevpen birlese qazaqstandyq bilim alýshylarǵa arnalǵan Abaı Qunanbaev jáne Júl Vernniń atymen atalatyn jańa bilim berý baǵdarlamasyn iske qostyq. Fransıa úkimeti «Abaı-Vern» bilim berý baǵdarlamasyn Halyqaralyq baǵdarlamalar ortalyǵymen birlese qarjylandyratyn bolady», - dedi Fılıpp Martıne.

İs-shara barysynda Igor Rogov, Ann Grınberg ı Antýan Kaze quttyqtaý sóz sóılep, bitirýshi túlekterge tabys tiledi.

Dıplom tapsyrý saltanaty merekelik konsertpen aıaqtaldy.

Aıta ketý kerek, 2014 jyly Abaı atyndaǵy Qazaq ulttyq pedagogıka ýnıversıtetiniń Sorbonna Parıj Sıte birlestigimen yntymaqtastyǵy aıasynda QR Prezıdenti Nursultan Nazarbaev jáne Fransıa Prezıdenti Fransýa Ollandtyń qatysýmen Sorbonna-Qazaqstan ınstıtýty qurylǵan bolatyn. Bul ınstıtýtta  bakalavrıat («Menejment», «Marketıń», «Halyqaralyq qatynastar», «Halyqaralyq quqyq», «Psıhologıa», «Geografıa») jáne qosdıplomdyq magıstratýra («Jahandaný kezeńindegi halyqaralyq kelisim dıalog» jáne «Qazirgi álemdegi ózgeristerdi basqarý») baǵdarlamalary boıynsha mamandar fransýz tilinde oqytylady.

QazAqparat

---