InfoHub Logo

Taqyryby: «Tapqyrlarǵa tapsyrma»
Maqsaty:
Bilimdilik: Balanyń qarapaıym matematıkalyq túsinikterden alǵan bilimin molaıtý, geometrıalyq pishinderdi tanyp, ajyrata bilýin jetildirý, qarapaıym san men sanaý túsinikterin qalyptastyrý, apta kúnderin ajyrata bilýge úıretý.
Tárbıelik: Oıynnyń shartyn saqtap oınaýǵa, uıymshyl, kópshil, shydamdy, sabyrly, shapshań bolýǵa tárbıeleý.
 Damytýshylyq: Sandardy týra, keri sanaýǵa úıretý, logıkalyq oıyn arqyly balanyń qıalyn, oı - órisin, este saqtaý qabiletin damytý.
Ádis - tásili: Suraq - jaýap, toppen jumys, jeke jumys, oı qozǵaý
 Kórnekiligi: Slaıdtar, zyryldaýyq oıynshyq (ıýla) sýretti kórnekilikter
Úlestirmeli materıaldar: Ár balaǵa úlgi kártishkeler, jáı qaryndashtar, kletka syzylǵan aq qaǵaz, ( kletkı 1*1sm), zyryldaýyq oıynshyq (ıýla)
Balalarmen shattyq sheńberin quramyz.
Amandasý úlkenge,
Tárbıeniń isi ǵoı
Al, kánekeı, bárimiz
Sálem,- deıik úlkenge
Qaıyrly kún, qonaqtar.
Qaıyrly tań, balalar
Balalar oryndaryna otyrady.
Tárbıeshi: Jyldyń qaı mezgili? Qys mezgiliniń erekshelikterin atatý.(slaıd arqyly qys mezgilin kórsetý)
Balalar: Qys aıy
Tárbıeshi: Qys aılaryn ata?
Balalar: Jeltoqsan, qańtar, aqpan. Tárbıeshi: Bir aptada neshe kún bar? Neshe kún baqshada bolamyz? Neshe kún úıde dem alamyz? (Balalardyń jaýaby)
 Tárbıeshi: Qymbatty balalar, búgin bizge qonaqtar kelip otyr, endeshe búgin erekshe kún! (Esik qaǵylady, topqa Dymbilmes keledi, qolynda «matematıka» dápteri bar) Dymbilmes: Balalar, men myna dápterdi taýyp aldym, dápterdi ashyp qarap edim eshteńe túsinbedim. Sender maǵan kómektesesińder me? Tárbıeshi: Balalar, áýeli kelgen qonaqpen tanysaıyq, amandasaıyq, solaı ma? Balalar: - Sálemetsiz be? Dymbilmes: - Oı, keshirińizder, Sálemetsizder me, meniń atym Dymbilmes bolady, mende senderdeı oqyǵym, bilgim keledi, mektepke barǵym keledi... Tárbıeshi: Dymbilmes sen bizge jaqsy keldiń, búgin mine bizge qonaqtar da kelip otyr. Balalardyń matematıkadan alǵan bilimderin qaraǵysy keledi eken, sende birge bolyp, matamatıka týraly biletin bolasyń. (slaıd arqyly «matematıka» dápterin kórsetý)
Tárbıeshi: Balalar, bul dápter senderge tanys pa?
Balalar: - Bul matematıka dápteri
Tárbıeshi: - Endeshe birinshi betin ashyp, qaraıyq, qandaı tapsyrma bar eken? (dápterdi ashyp kórsetý, balalar dápterdi slaıd arqyly qaraıdy)
1. Tapsyrma. Oıyn: «Ańdarǵa ornyn tabýǵa kómektes» Maqsaty: Vagondardyń sanyna qaraı, ańdardy ornalastyrý. (Balalar tapsyrmany oryndarynda otyryp oryndaıdy, qaryndashpen syzyp kórsetedi, bir bala taqtada oryndaıdy) Tárbıeshi: Dymbilmes, sende balalarmen tapsyrmany oryndap, úıren. Endi balalarmen saýsaq sanap, jattyǵý jasaıyq.
Sergitý jattyǵýy: Bir degeniń besik,
Sodan shyqtyq óstik.
Eki degeniń elim,
Ózen taýym kólim
Úsh degenim úmit,
Úmit artar jigit
Tórt degenim tózim,
Tóze bilem ózim
Bes degenim baqyt,
 Baǵalaıtyn ýaqyt.
2. Tapsyrma. «Apta kúnderi qaıda turady?»
(Bir bala tapsyrmany taqtada oryndaıdy, qalǵan balalar oryndarynda oryndaıdy.) Maqsaty: Úılerge sandardy retimen ornalastyrý. Tárbıeshi: Apta kúnderin kim atap, aıtyp beredi?
Dınara: Dúısenbide dop oınadym dalada
Seısenbide serýen qurdym qalada
Sársenbide sýret saldym sándetip
Beısenbide bı bıledim ándetip
Juma kúni jıdek terdim aǵashtan
Senbi kúni kıno kórdim klýbtan
Jeksenbide úıde boldym dem aldym
 Osylaısha óte shyqty bir apta
3. Tapsyrma. «Pishinderdi paıdalanyp, oıynshyqtar qurastyr» Maqsaty: Ár túrli pishinderden oıynshyqtar qurastyrý. (Bir bala taqtada oryndaıdy, qalǵan balalar oryndarynda otyryp pishinderden ártúrli oıynshyqtar jasaıdy) Sergitý jattyǵýy: «Jan sergitý» (Balalar mýz áýenimen, qımyldardy oryndaıdy) Tárbıeshi: Balalar, myna sýrette kimdi kórip tursyńdar? Balalar: Balanyń sýreti, ol oılanyp tur. Tárbıeshi: Endeshe, balalar, Dymbilmes seni de oılanyp esepter shyǵarýǵa shaqyramyn.
3. Tapsyrma:
Logıkalyq esepter. Tabaqta bes alma,
Qolymda eki alma.
Qosqanda barlyǵy
Bolady neshe alma?
 (jeti)
Bir alma apama,
Bir alma atama.
Eki alma beremin
Mamam men papama.
Nesheýi qalady tabaqta?
 (úsheý)
Tórt qonjyq ormanda
Kele jatty qorbańdap
Bireýi sharshady
 Ármen qaraı barmady. (úsh qonjyq)
« Saýsaqpen sanap úıreneıik»
Bes kámpıtim bar edi,
Sarańdyǵym joq edi.
Bir kámpıtim ataǵa,
Bir kámpıtim ájege,
Bir kámpıtim anama,
Bir kámpıtim ákeme.
 Ózime de jete me?
Tárbıeshi: Balalar, Dymbilmespen qyzyqty oıyn oınaǵylaryń keleme? Balalar: - Iá, oınaǵymyz keledi. Tárbıeshi: - Endeshe, oıynymyz «Qandaı esep bolsa da, sheshpeı ony qoımaıyq!» dep atalady. Mynaý oıynshyq senderge tanys pa? Ol qalaı atalady? Durys, zyryldaýyq (Iýla) dep atalady. Zyryldaýyqtyń tómengi bóliginde qyzyl tústi tili bar, zyryldaıyqty aınaldyramyz, toqtaǵanda tili qaı sanǵa toqtasa, sol sanǵa baılanysty tapsyrmalardy oryndaımyz. (tapsyrmalardy slaıd arqyly oryndaıdy) №1 «Balyq aýlaý» Maqsaty: sandy qosyp, azaıtý amalyn oryndaý №2 «Kórshisin ata» Maqsaty: Jetispeıtin sandy taýyp qoıý. №3 «Qaı adamnyń sýreti joq?» Maqsaty: Jetispeıtin fıgýrany tabý. №4 «Ne artyq?» Maqsaty: Zattardy toptaý, artyq zatty kórsetý. №5 « Kletkalardy sanap, qosaıyq, altyn kiltti tabaıyq» (Dymbilmeske bilim kiltin jasaý)
Tárbıeshi: Balalar búgin mine Dymbilmestiń matematıka dápterindegi tapsyrmalardy oryndap, qyzyqty oıyndar oınadyq, báriń jaqsy qatystyńdar. Dymbilmes: Balalar men sendermen birge bolǵanyma óte qýanyshtymyn, sender qyzyqty esepter shyǵaryp, oıyndar oınap, maǵan matematıka týraly kóp málimet berdińder. Aldaǵy ýaqytta sender sıaqty oqıtyn, biletin bolamyn. Tárbıeshi: Endeshe balalar biz Dymbilmeske jaqsy oqýshy bolsyn dep tilek tilep, bilim kiltin syılaıyq. (Dymbilmes balalarmen qoshtasyp, ketedi)
Balalar: Qol ustasyp turaıyq
 Sheńberdi biz quraıyq.
 Kóriskenshe kún jaqsy,
  Saý salamat bolaıyq!
Kútiletin nátıje:
Bilý: geometrıalyq pishinderdi ajyratyp, ataı bilý. Igerý: logıkalyq oıyn arqyly balanyń qıalyn, oı - órisin, este saqtaý qabiletin damytý.
 Meńgerý: Sandardy ajyratýdy, keri, týra sanaýdy, suraqtarǵa durys jaýap berýdi meńgerý.
Ashyq uıymdastyrylǵan oqý qyzmetiniń konspektisi
Mektepaldy daıarlyq tobyna arnalǵan
№ 33 «Nursát» mektepke deıingi bilim ortalyǵynyń tárbıeshisi:
Satenova Gýlfaram Ospanovna