InfoHub Logo

Muǵalıma bul synypqa jańadan kelgen edi. Ol jas ári jigerli ustaz bolatyn. Jumys istegisi kelip qulshynyp turady. Anyǵyna kelgende, ol ustazdyq qyzmetti endi ǵana bastap jatqan joq. Munyń aldynda da az-maz tájirıbesi boldy. Degenmen oǵan jańa orta da, synyp ta áli tolyq tanys emes edi. Sóıtse de muǵalıma óz jumysyna aıryqsha bir yqylaspen kirisip ketti.

Birde ol synyppen birge kesh ótkizgisi keldi. Keshke óz oıynsha balalardyń ata-analary da qatyssa eken dep tiledi. Dálirek aıtqanda, olardyń analary qatyssa eken. Sebebi muǵalımanyń maqsatynda keshtiń taqyrybyn ana taqyrybyna arnasam degen oı turǵan edi.

Birde ol óz oıyn synypqa osylaısha jetkizdi. Keshti bárimiz birge ótkizemiz dedi muǵalıma. Budan eshkim de tys qalmaq emes. Al analarymyz qonaq bolyp otyrady. Balalarǵa bul oı birden unaı qaldy.

- Degenmen, - dedi muǵalıma. - keshimizge taqyryp oılap tabýymyz kerek. Men muny senderdiń ózderińniń oılanýlaryńa qaldyrdym. Kim keshimizge jaqsy taqyryp oılap tabady eken? Muny senderge mindettemeımin. Óz yntalaryńmen kiriskenderiń jaqsy. Biz sosyn unaǵan taqyrypty alyp keshimizdi solaı atar edik. Bizdiń áli de ýaqytymyz bar. Taqyryp ana tóńireginde bolmaq.

- Taqyryp senderdiń óz júrekterińnen shyǵýy kerek, - dedi muǵalıma taǵy da. - Ol esh jerden kóshirilip alynbaýy tıis. Ol tipti qarapaıym sóz nemese sóılem bolsyn, senderdiń óz júrekterińniń sózi bolǵany qajet. Sender muny óz analarymyzǵa aıtyp jatyrmyz dep sezinińder. Ózgeniń júregindegi ádemilikten óz júregińdegi qarapaıymdylyq áldeqaıda kórkem estiledi. Osy bastan osyǵan daǵdylanyńdar.

Balalar bul iske qulshyna kirisip ketti. Múmkin olardyń bári de óz júrekterindegi sózdi analaryna jetkizýge asyqqan shyǵar. Olar ár kún saıyn júrekterinen shyqqan taqyryp retinde alynǵan sózdi ustazdaryna sondaı bir elgezek minezben usynatyn. Muǵalıma olardy oqyp kúlimsirep turady. Balalar ózderi oılap tapqan taqyryptyń qaısysy apaılaryna kóbirek unaıdy eken dep ishteı qobaljyp ta júrdi.

Synyp osy bir iske ishki jan-dúnıelerimen berile kirisip ketken edi. Tek bir bala ǵana buǵan atsalysqan joq.

- Sen nege buǵan atsalyspaısyń? - dedi birde muǵalıma onyń janyna kelip.

Bala ustazy janyna kelgende ornynan turdy. Kenet ol:

- Meniń anam joq...anam joq...- dedi býlyǵa jylap jiberip. - Men taqyryp oılap taba almaımyn.

Ustaz sasqalaqtap qaldy.

- Seniń anań dúnıe salǵan ba edi? - dedi ol sybyrlaǵandaı etip sóılep.

Bala basyn ızedi.

Muǵalımanyń alaqany beıne bir shákirtiniń basynan sıpaǵysy kelgendeı kóterile berdi. Osy kezde bala:

- Onyń orny bólek edi, - dedi býlyǵa jylap turyp.

Balanyń bul sózdi jasqa býlyǵyp aıtqanynan muǵalıma estı almaı qaldy.

- Ne dediń? - dedi ol shákirtine eńkeıe túsip.

- Onyń orny bólek edi, - dedi bala.

"Bólek eken ǵoı, - dedi muǵalıma ishinen, - bólek eken".

- Al ákeń bar ǵoı?

Bala basyn ızedi.

"Demek, áke ananyń ornyn toltyra almaıdy eken ǵoı".

Kenet muǵalıma serpilip ketti.

- Balalar, - dedi ol synypqa estilerdeı daýyspen. - biz analarymyzǵa arnalǵan óz keshimizdiń atyn "Orny bólek jan" dep atasaq qaıtedi? Shynynda da, bizdiń bárimizge de analarymyzdyń orny aıryqsha bólek qoı.

Balalar buǵan biraýyzdan kelisti.

"Ony keshke atsalystyrýym kerek, - dedi muǵalıma. - Múmkin oǵan júrgizýshiliktiń birin usynarmyn. Balalar óz keshterin ózderi júrgizedi ǵoı.
Bári de múmkin".

Muǵalıma qyz áldenege jany aýyrǵandaı ernin tistelep oılanyp qaldy.

---