InfoHub Logo

Stýdent muǵalimdik tájirıbeden ótýge kelgen synypta synypqa orys tili men ádebıetinen sabaq berip, ózderi de muǵalimdik tájirıbeden ótip júrgen eki stýdent qyz bar edi. Bulardyń úsheýine de ortaq bir mindetteri osy synypqa ashyq tárbıe saǵatyn ótkizýleri kerek bolatyn. Qyzdar bul turǵyda synyptyń daıyndyǵyn da ózderi daıyndaǵan edi, kórneki quraldardy da ázirlep shyqty. Úsheýine ortaq bolyp esepteletin bolashaq ótkizilgeli turǵan ashyq tárbıe saǵatynyń taqyryby ana taqyrybynda bolatyn.

Ashyq tárbıe saǵatyn ótkizý jónindegi oı qozǵalǵannan bastap-aq, qaladaǵy osy bir mektepte muǵalimdik tájirıbeden ótip júrgen barlyq stýdentterge qobaljý týǵyzǵan bir jaǵdaı boldy. Ol ózderi ótkizgeli turǵan ashyq tárbıe saǵattaryn kórýge, baǵalaýǵa keletin pedagog maman týraly áńgime edi. Bul mamandy osy jerde júrgen stýdentterdiń birde-biri tanymaıtyn bolyp shyqty. Ózi ózge ult ókili eken, biraq másele onda da emes edi. Pedagog maman jaıynda aıtylǵan sózge qaraǵanda, bul mamannyń bolashaq muǵalim bolamyn degen janǵa qoıatyn qatań talabynyń údesinen shyqqanda baryp qana joǵary baǵadan úmittenýge bolady, anyǵynda mamannyń ózi de saýatty pedagog degen sózder edi. Kóp uzamaı stýdentterdi abyrjytyp, osy oıdy naqtylaı túsken bir oqıǵa boldy. Ol osynda júrgen bir top stýdenttiń ótkizgen
ashyq tárbıe saǵatynyń "3"-ke baǵalanyp qalýy edi. Bul ózge stýdentterge de qatty áser etti. Sebebi osy mektepte muǵalimdik tájirıbeden ótip jatqan stýdentterdiń arasynan "5"-ke birden-bir úmitker dep tanylǵan osy stýdentter edi. Olardyń daıyndyǵy myqty, sabaqtary kórnekiliktiń barlyq túrimen de qamtylǵan bolatyn. Biraq pedagog maman sabaqty qorytyndylaǵanda "ortasha" dep baǵalapty. Osyny kórgen stýdenttiń janyndaǵy bolashaq orys tili pániniń muǵalımalary "bizge "5"-tik qajet emes, tek "3" alyp qalmasaq boldy" dedi.

Mejeli kún de kelip jetti. Sol kúni eki stýdent qyzdyń biri sabaqqa kele almaı qaldy. Qurbysynyń aıtýynsha, ol turmys qurǵan, kishkene sábıi aýyryp qalypty. Ekinshi qyz osy ashyq tárbıe saǵatyn júrgizýdi úsheýiniń arasynan mindetine alǵan edi. Kenet ol stýdentke kelip: "Ashyq tárbıe saǵatyn sen júrgizesiń be? Men qatty abyrjyp turmyn" dedi. Stýdent jeme-jemge kelgende jaýapkershiliktiń tizgini ózine qaraı burylyp keter dep oılamaǵan edi. Biraq áriptes qyzdyń túrinen, shynynda da, qatty abyrjyp turǵandyǵy baıqaldy. Stýdent senarımen jetkilikti jaǵdaıda tanys emes jáne kórnekilikterdiń mazmunyn da tıanaqtap alýy kerek bolatyn. Ol senarıge kóz júgirte bastady. Degenmen sabaq onyń óz sózimen aıtylýy kerek edi. Sosyn kórnekilikterine buryldy. Shynynda da, bulardyń kórnekilikteri
az ári qarabaıyrlaý edi. Muny "5"-tik baǵa alamyn dep turyp, "3"-ke baǵalanyp qalǵan sabaqtyń kórnekilikterimen salystyrýǵa múlde kelmeıtin. Kenet mekteptiń qońyraýy berile bastady. Sonan soń baspaldaqpen joǵary qaraı asyǵys júgirgen oqýshylardyń aıaq dybystary men synyp esikteriniń sart-surt ashylyp-jabylǵany estildi de, sálden keıin-aq bári tynshı bergen sátte bulardyń synybynyń esigi ashylyp, álgi pedagog ustaz kirip keldi. Eýropalyq bıkeler sekildi, talǵammen kıingen áıel adam eshkimge de nazar aýdarmaǵan kúıi synyptyń artqy bóligine qaraı ótip bara jatty da, onyń sońynan ashyq qalǵan esikten bolashaq aǵylshyn tili pániniń muǵalımasy bolǵaly júrgen bir top stýdent qyz kirip kelip, olar da ustazdyń sońynan synyptyń artqy bóligine qaraı ótip bara jatty. Sabaq bastalyp ketti...

Sabaqtyń sońynda oqýshylardyń kelgen qonaqtarǵa qurmet bildirip ornynan kóterilýimen birge pedagog ustaz osy synypqa qalaı kirse, dál solaı eshkimge de nazar aýdarmaǵan kúıi synyptan shyǵyp bara jatty da, onyń sońynan ile-shala kóterilgen aǵylshyn tiliniń bir top bolashaq muǵalımalary da synyptan shyǵyp ketti. Ashyq tárbıe saǵatyna jaýapty eki stýdent álgi toptyń sońynan ilesti.

Bir bólmege jınala qalǵan toptyń shaǵyn jıynyn pedagog ustaz bir aýyz sózben ózi bastady da, aǵylshyn tiliniń bolashaq muǵalımalaryna ıek qaqty:

- Sóıleńder, taldańdar, baǵa berińder.

Aǵylshyn tiliniń bolashaq muǵalımalary birinen soń biri álginde ǵana bolyp ótken ashyq tárbıe saǵatynyń kórnekilikterin synǵa ala bastady. Biraq máseleni eń sońynda kórnekilikter sheshken joq edi. Pedagog mamannyń ózi sabaqty qorytyndylaı keldi de, ótilgen sabaqty "5"-ke baǵalady.

- Eń basty másele sabaqtyń ishki mazmunynda, - dedi ol. - Bul sabaqta ananyń ómirdegi orny shákirtterge jan-jaqty ashyldy. Ananyń qoǵamdaǵy jáne otbasyndaǵy róli qatarlastyra alynyp otyrdy. Bulardyń kórnekilikteri az boldy, biraq sol az kórnekilikpen jumys isteldi. Sabaq - óziniń áý bastaǵy tańdap alynǵan taqyryby boıynsha maqsatyna tolyq jetken sabaq. Sondyqtan ol "5" dep baǵalanýy tıis.

Osy kezde bolashaq orys tili pániniń muǵalımasynyń kóz jasyna erik bergeni. Ol synypqa kelip te jylap turdy. "Men "5" týraly tipti de oılamaǵan edim" dedi ol. Ony 7 "Á" synybynyń shákirt qyzdary qorshalaı alyp, apaılaryn quttyqtap jatty.
 

---