InfoHub Logo

Tezek tóreniń jalǵyz balasy ólgende úsh kúnge sheıin kómbeı balasyn qımaı otyrǵan. Sonda ózi 80 jasta edi. Sol kezde óziniń qol astyndaǵy halqy jınalyp eshqandaı jaýap bere almaı otyrǵanda, Qyzylbórik Qatkeldi degen 16 jastaǵy jetim bala kelip: «Men aıtamyn», — dep, esikti túrip aıtqan kóńili:

Assalaýmaǵaleıkým, aldıar taqsyr tórem!
Arǵymaq sý ishem dep shólge keter,
Suńqar, qaz balyǵym dep kólge keter.
Kóńil aýnap selt eter,
Bári ózimiz baratyn jerge keter!
Qasa suńqar qaz ilse,
Qanatyn jerge tıgizbes.
Qas patshaǵa qaıǵy tússe,
Qaıǵysyn halqyna bilgizbes.
Kekilik tasqa shyǵar sekirip,
Myna opasyz dúnıede
Kim qalady bekinip?
Al sen tuǵyrdan tuıǵyn ushyrypsyń,
Kudaı artyńnyń qaıyryn bersin!
Aı, tórem, bala kóp,
Kóptiń balasy bolmasa,
Bul balaǵa kóp kele me?!
Kóp sılaǵan balańyz bolmasa,
Kóp Sizge kóńil aıta ma?!

Sonda kópshilik turyp: «Oıbaı, Qatkeldi, kóńildi aıttyń, nege boqtadyń? Bizdi aıyptaıdy ǵoı», — degen. Sonda Qatkeldi aıtady: «Tóreńiz aqyldy bolsa biledi, aqymaq bolsa bizdi aıyptaıdy», — dep atyna minip júrip ketken. Sonda tóre dalaǵa shyǵyp Qatkeldini shaqyryp alyp: «Balam, jańaǵy sózińdi qaıta aıtshy?», — dep, qaıta aıtqyzǵan. «Durys aıtasyń, balam, balamnan aqyldy eken» dep, halqyn qurmettep, oınap-kúlip júrip ketken eken.

---