InfoHub Logo

Ustazǵa tilek
Qymbatty Ustaz!
Eger shákirttik jyldarymyzdyń baldáýren, balalyq sezimge toly paraqtaryn búgingi eseıgen, es toqtatqan bolmys - bitimimizben taǵy da bir oı eleginen ótkizip, saraptap otyrsaq, sonyń ár betinde kózge ystyq, kóńilge jyly kórinip ushyrasa beretin aıaýly bir beıne bar, ol - Ózińiz.

Sodan beri ótkizgen árbir jylymyzdyń mazmun - maǵynasynda aqyl - parasat, sabyr men tózim, adaldyq pen ar dúnıesine degen ińkárlik, ádildik pen jaqsylyqqa degen qushtarlyq, mahabbat pen dostyqqa degen tabandylyq tanylyp, izgilik pen rýhanıatqa júrek kózi ashylyp,"boıda qaırat, oıda kóz" jatqan sátterimiz az ushyraspasa, osynyń barlyǵynyń túpki tórkini - Sizdiń enshińizde.

Shákirtterińizben aralasa júrip qyzmet etken sátterińizde, bizdiń áli qalyptasa qoımaǵan balań sana - sezimimizge baǵa jetpes bilim, bilik baılyǵyn sińirýdi, sóıtip ǵylym áleminiń taýsylmaıtyn shetsiz - sheksiz kókjıegine jeteleýdi ǵana maqsat etip qoıǵan joqsyz, Siz eń aldymen myna álemge, myna qoǵamǵa, myna ómirge Adam berýge tyrystyńyz. Bul tipti de Sizdiń mándi de maǵynaǵa toly ustazdyq sátterińizdiń basty ólshemine aınalǵandaı edi.

Sizden bólinip, qanat qataıtyp, ómir baspaldaǵynyń basqyshymen árbir sátte ilgeri aıaq basqan kezderimizde, Siz sińirgen ónege men tálimdi ómirdiń ózinen sabaq ala otyryp, burynǵydan da aıqyn, burynǵydan da jarqyraǵan kóńil kózimen sezindik, boıǵa uıalattyq, júrekke jaqyndattyq. Ómir baspaldaǵymen neǵurlym ilgeri basqan saıyn - Ar, Adaldyq, Tazalyq, Jaqsylyq, Ádilettilik, Shyndyq, İzgilik, Dostyq, Mahabbat sıaqty qasıetti uǵymdar Sizdiń Ustazdyq beıneńizben úılesim taýyp, aldymyzdan shyǵyp otyrdy, osy uǵymdardyń aldynda súringen sátterimiz bola qalsa, sol Ustazdyq beıneńizden qysyldyq.

Ǵumyr - darıanyń ótkel bere qoımas asaý tolqynyna ushyrasyp, ıirimdi aǵysyna qarsy árbir qadam jasaǵan sátterimizde de, Siz aıtqan sózder jaqsylyq ushqynyndaı bolyp, baǵyt - baǵdar berer shamshyraǵymyzǵa aınaldy, Siz nusqaǵan bıigi men shyńynan únemi qol bulǵap, men mundalap otyrdy. Sonda baryp ustaz uǵymynyń qasıeti men ulylyǵyn uǵyndyq, túısindik, paıym - parasat bıiginen paraqtadyq. Oı kózimen sarapqa saldyq. Asyl dúnıesin qaıta tapqan joqshydaı óz urpaǵymyzdyń boıyna sińirýge tyrystyq.

Qadirli ustaz!
Ózińizden alystap, ómir soqpaǵymen árbir qadam alǵa basqan saıyn, tulǵańyz sonshalyqty bıikteı tústi, sol bıikteı túsken bolmysyńyz janǵa jiger syılaǵany bir basqa, árdaıym da ýaqyt kemesin balalyq minezderimiz jazıra jaǵalaýynda qalyp qoıǵan keshegi kúnderimizdiń tup - tunyq aıdynyna taǵy da bir sát buryp áketip otyrýshy edi.

Qurmetti ustaz!
Osyndaı ótken shaqtarymyzdyń balǵyn beınege toly paraqtaryn taǵy da bir tamashalaı qarap, oı eleginen ótkizip, úńile túsken sátterimizde de, sol qyzyqty jyldardyń basty tulǵasy bolyp sanalatyn Ózińizge myqty densaýlyq, qajyrly qaırat, tolaǵaı tabystar tileı otyryp, otbasyńyz ben balalaryńyzdyń amandyǵyn, eńbek etken ustazdyq jyldaryńyzdyń jemisin, ul - qyzdaryńyzdyń qyzyqshylyǵyn kóre berýińizge árdaıym da shyn júrekten tilektestik bildirýshi:
Sizdiń shákirtterińiz

ÁKE
(balalarynyń tilegi)
Qorǵashtap ómir deıtin synda bizdi,
Júrdińiz eńkeıtpesten tulǵańyzdy.
Áketaı, deımiz sizge júz jasańyz,
Aq tilek taǵyńyz da jyrdan izgi!

Ómirde talaı asý alynǵany,
Baqyttyń oty bizge jaǵylǵany -
Bir Sizdiń eńbegińiz eken, Áke,
Búginde oılap tursaq - sonyń bári.

Biz úshin ótken talaı jyldaryńyz,
Jatyr ǵoı sol ómirde tulǵaly iz.
Ákelik mektebińizden tálim alǵan
Bul kúnde ózi de áke uldaryńyz.

Ósti urpaq, sońyńyzdan jetildi iz,
"Ata!"- dep aıdarly ul, kekildi qyz.
Sonda da butaq jaıǵan ul - qyzyńa
Áli de qatal ustaz sekildisiz.

Ómirde berip bizge taǵlym iz,
Úıretken az boldy ma tálimińiz.
Jetsek te jetistikke, aldyńyzda
Baladaı bop turamyz báribir biz.

Ómirde úlgimiz de bir Siz, Áke,
Perzentke taýsylmaıtyn jyrsyz, Áke.
Sol tulǵa, sol minezden alasarmaı,
Bizderge tálim bolyp júrsiz, Áke.

Áli de bıik bolsyn juldyzyńyz -
Arnalǵan perzentterden jyr - gúlimiz.
Júrińiz aman - esen ortamyzda,
Tileıdi sony búgin ul - qyzyńyz!

Qyzylorda qalasy.
Avtory: Ǵabıden QOJAHMET