İ
Ómirimniń órlerin,
Jazy shyqpas, qys qylshy!
Jyly shyraı ber desem,
Ajdahadaı ysqyrshy!
Quldyq uryp jalynsam,
Art jaǵyńa qystyrshy!
Altyn, kúmis asylyma,
Baǵa bermeı mys qylshy!
Ońǵa qaraı qol sozsam,
Teriske joryp pysqyrshy!
Nahaq mazlum bolsań da
Kúnshilikpen is qylshy!
Bulardyń barlyǵy oıynshyq,
Tek aýrýdan tys qylshy!

II
Turmys, maǵan ot shashyp,
Bar dúnıeni laý qylshy!
Túıdektep úıip qaıǵyńdy,
Abylaı aspas taý qylshy!
Taptyrmastan emge dos,
Bar álemdi jaý qylshy!
Kózińniń quny bardaı - aq
Aıaq bassam, aý qurshy!
Bermek tursyn, ózime
Jala jasap daý qylshy?
Sóndir Aı men Kúnińdi,
Tek denimdi saý qylshy!

III
Den saý bolsa, taǵdyrdyń,
Kókke ushyram kúlderin!
Jigermen talap etken soń,
Qoıam ba eken súlderin.
Ajdahadaı aqyryp,
Aldymnan qarsy shapsa da
Estimeımin únderin!
Serpip tastap túnderin,
Týǵyzamyn kúnderin!

IV
Den saý bolsa, turmystyń
Maǵan solaı quryǵyn
Boılap alyp ketermin!
Taýdaı úıgen qaıǵysyn
Oınap alyp ketermin.

V
Qańqyldatyp qazdaryn,
Shyǵararmyn jazdaryn.
Men aıtamyn osylaı
Kim biledi, ol turmys
Nesheler qabir qazǵanyn.
Qazsa qazsyn, kórermin
Keleshektiń jazǵanyn,
A, dúnıe halqymnyń
Jónge salsam azǵanyn,
Turmasty salyp kóldeneń,
Qarǵytar Mahmut azbanyn.

---