InfoHub Logo

Eger siz áke bolsańyz, sizdiń kishkentaı, judyryqtaı ǵana ulyńyz bar bolsa, onyń bolashaqta qandaı jigit bolyp óspegin baıqap kórmek bolsańyz, onda ony ana bólmedegi shylymǵa jumsap kórińiz.

Eger siz ulyńyzǵa "Bar, ana bólmedegi shylymdy alyp kel" degen sátte, ulyńyz qıqańdap, tálpishtenip barmaı jatsa, onda mundaı balany jazalaý kerek. Óıtkeni ol erteń bastyqpen jumys isteıtin jigit bolady. Al eshqandaı bastyq sizdiń ulyńyzdyń mundaı qıqań-sıqań minezin kótere bermeıdi. Sondyqtan oǵan osy bastan sabaq bola bersin.

Eger siz ulyńyzǵa "Bar, ana bólmedegi shylymdy alyp kel" degen sátte, ulyńyz digi-dik, digi-dik dep shapqylap baryp shylymyńyzdy ákep berse, onda bári durys bolǵany. Erteń ol bastyǵy jumsaǵanda da osylaı digi-dik, digi-dik dep shapqylap júretin jaqsy jigit bolyp ósedi.

Eger siz ulyńyzǵa "Bar, ana bólmedegi shylymdy alyp kel" degen sátte, ulyńyz shylymnyń janynda jatqan sirińkeńizdi de qosa alyp kelse, ne isteısiz? Qýanasyz ba? Mundaı balany jazalaý kerek. Óıtkeni bul bala ózdiginen oılana alatyn bala bolyp tur. Ol óskende bul minezinen ekijaqty turǵyda utylatyn bolady. Sondyqtan oǵan sabaq bola bersin. Birinshiden, onyń bul qylyǵyn bastyǵy jaqtyrta bermeıdi. Óıtkeni oǵan sirińke jaıly áńgimeni bastyǵy aıtýy kerek bolatyn. Ol dál qazir bastyqtyń sharýasyna aralasyp ketti. Ekinshiden, onyń bul minezi áriptesterine de unaı bermeıdi. Al, úshinshiden, ózdiginen oryndalǵan jumysqa marapatty bylaı qoıǵanda, raqmet te aıtyla qoıýy qıyn.

Eger siz ulyńyzǵa "Bar, ana bólmedegi shylymdy alyp kel" degen sátte, ulyńyz shylymnyń janynda jatqan sirińkeni de qosa ala kelýdi bile turyp, biraq ákelmeı, tek shylymyńyzdyń ózin ǵana ákelip berse, onda bári durys bolǵany. Óıtkeni jaqsy kadr dep berilgen tapsyrmany ǵana oryndap, oǵan ózdiginen eshteńe alyp-qospaı, sol úshin marapat alyp otyratyn adamdardy da aıtamyz.

Biraq siz ulyńyzǵa mindetti túrde urysatyn bolyńyz. Ne dep urysasyz? "Kishkentaı mıǵula-aý, ana bólmege sonshama digi-dik, digi-dik dep shapqylap barǵanyńda, shylymnyń janynda jatqan sirińkeni de ala kelýge mıyń jetpeı qaldy ma?!" dep urysasyz. Óıtkeni oǵan dál osy sózdi erteń bastyǵy aıtatyn bolady. Qysqasy, "bylaı tartsa, ógiz óledi, bylaı tartsa, arba synady".

Eger siz urysyp jatqanda, ulyńyz dym jylamaı, renjimeı tura beretin bolsa, onda bári durys bolǵany. Óıtkeni erteń bastyǵy urysyp jatqanda da, urysqa eti ólip ketetin, shybyn shaqqan qurly kórmeıtin, tózimdi, jaqsy kadr bolady.

Sonymen shylymyńyz ben sirińkeńizdi ulyńyzǵa aldyrtyp aldyńyz. Endeshe, shegińiz. Biraq aqyl aıta otyryńyz. Qandaı aqyl aıtasyz? Mundaıda eń tıimdi taqyryp - ar-uıat taqyryby. Óıtkeni ulyńyz keıde úlkenderdiń tarapynan ózderi oryndaı bermeıtin, biraq kishilerge únemi aıtylyp otyratyn mundaı áńgimelerdi jıi estip ósetin bolady. Qulaǵy úırene bersin.

Siz muny qalaı atqarasyz? Op-ońaı! Bar bolǵany shylymyńyzdyń tútinin ernińizden syzdyqtatyp shyǵaryp otyryp, ulyńyzǵa "Túrsıińdi kıip al, uıat bolady" deseńiz, jetip jatyr. Siz ar-uıat taqyrybyna áńgime qozǵap jiberdińiz.

Eger siz shylymyńyzdyń tútinin ernińizden syzdyqtatyp shyǵaryp otyryp, ulyńyzǵa "Túrsıińdi kıip al, uıat bolady" degen sátte, ulyńyz kip-kishkentaı trýsıin ala salyp, jalma-jan kıip ala qoısa, ne isteısiz? Qýanasyz ba? Kúrsinińiz. Óıtkeni myna bala bolashaqta ar-uıatty aınalyp ótip baryp, óziniń qara basyna paıda keltirgeli turǵan talaı nárseden qur qalyp qoıaıyn dep tur.

Eger siz shylymyńyzdyń tútinin ernińizden syzdyqtatyp shyǵaryp otyryp, ulyńyzǵa "Túrsıińdi kıip al, uıat bolady" degen sátte, ulyńyz kip-kishkentaı alaqanymen "kámpıtin" basa qalyp, sizden óp-ótirik uıalǵan keıip tanytqansyp, birazdan keıin qarasańyz, áli sol jalańbut kúıinde shapqylap júrse, onda bári durys bolǵany. Óıtkeni onyń qoǵamdaǵy keıbir kókeleri men táteleri de zamatynda óp-ótirik uıalǵan bola qalyp, birazdan keıin qarasańyz, "baıaǵy jartas - bir jartas" kúıinde shapqylap júre beretin bolady. Ulyńyz solardyń arasyna baryp "kirpish bolyp qalanyp" ketkeli tur. Ýaıymdamańyz.

Eger siz ulyńyzdy ózińiz ómir súrip jatqan qoǵamǵa daıyndap jatsańyz, onda osy bir ádistermen synap kórińiz.

Báribir siz bulaı etpeseńiz de, keıbir adamdardyń balalaryn bolashaq qoǵamǵa daıyndaýda osyǵan uqsas birdeńelermen aınalysyp daıyndaýy da ǵajap emes qoı.

---