InfoHub Logo

Hakim Atanyń anyq esimi — Súleımen. Balalyq shaǵynda mektepke bara jatqanda basqa balalar sıaqty Qurandy moınyna aspaı, qolymen astynan ustap, qurmetpen alyp júretin. Mektepten shyqqanda da betin mektepke qaraı, artyn úıge qaraı berip qaıtatyn. Bir kúni Qoja Ahmet Iasaýı meshit tabaldyryǵynda otyrǵan kezde ony kóredi, álgi áreketi buǵan unap qalady. Qoja sóıtip balanyń ákesi men anasynyń rızashylyǵyn alyp, Súleımendi Quran oqytý úshin janyna alady. On bes jasyna kelgennen keıin Qojaǵa shákirt bolady. Bir kúni Qyzyr áleıkýmsálám Qojaǵa qonaqqa keledi. Qoja tamaq pisirý úshin shamaly otyn ákelýge balalardy jumsap jiberedi. Otyn ákele jatqanda qatty jańbyr jaýady. Ákelingen otynnyń bári sý-sý bolyp qalady. Tek Súleımen kıimin sheship, otyndy oraǵandyqtan, ol ákelgen otyn ǵana qurǵaq bolady. Sonyń arqasynda basqa otyndar da janady. Qyzyr áleıkýmsálám otynnyń nege qurǵaq bolǵanyn Súleımennen suraıdy. Ol sebebin aıtyp beredi. Qyzyrǵa bul jaýap unaıdy, balaǵa: «Budan bylaı atyń Hakim bolsyn!» — deıdi. Sodan keıin aýzyna túkiredi. Súleımenniń ishi nurǵa tolady. Qyzyr: «Qane, turma, rýhanı nár shyǵar!» — deıdi. Hakim Ata sol mezetten bastap birneshe hıkmetter, óleńder aıta bastaıdy.

 

---