InfoHub Logo

قورقىت اتا اتىنداعى قىزىلوردا مەملەكەتتىك ۋنيۆەرسيتەتى ۇستازدار مەرەكەسىنە وراي «ۇستاز - ءبىلىم شامشىراعى» اتتى مەرەكەلىك كەش وتكىزدى. بۇل تۋرالى ۋنيۆەرسيتەتتىڭ باسپا ءسوز قىزمەتى حابارلادى.

شارادا ۋنيۆەرسيتەت رەكتورى، ت.ع.د.، پروفەسسور ق.ا.بيسەنوۆ ۇستازداردىڭ قوعامداعى ورنىنا توقتالىپ، قوناق رەتىندە شاقىرىلعان ارداگەر-ۇستازداردى، وقىتۋشىلار قاۋىمىن كاسىبي مەرەكەلەرىمەن قۇتتىقتادى.

-  حالقىمىزدىڭ دانالىعىندا: «مىڭ جىلدىعىڭدى ويلاساڭ - ۇرپاق تاربيەلە»  دەگەن ۇلاعاتتى ۇعىم بار. بۇل - ءبىزدىڭ رۋحاني تىرەگىمىز، ۇلتىمىزدىڭ بولاشاعى، ادامزات وركەنيەتىنىڭ قاينار بۇلاعى، تەرەڭ تاعىلىمعا تولى - كەمەل كەلەشەگىمىزدىڭ تىرەگى. سوندىقتان ۇرپاق تاربيەسىنىڭ قوعام الدىنداعى شىنايى مىندەتىنىڭ سالماعىن دا، ءمانىن دە جۇرەكپەن تۇسىنە الاتىن، ۇعىنا بىلەتىن ءقادىرلى ۇستازدار، سىزدەردى بۇگىنگى مەرەكەمەن قۇتتىقتايمىن! - دەدى ول.

مەرەكەلىك كەش بارىسىندا 2015-2016 وقۋ جىلىنداعى ءبىلىم بەرۋ قىزمەتىندەگى جەتىستىكتەرىن باعالاۋ جونىندەگى ۋنيۆەرسيتەت رەيتينگىسى  بويىنشا ەڭ جوعارى بالل جيناعان 5 پروفەسسور-وقىتۋشىعا ۋنيۆەرسيتەت رەكتورى «قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ۇزدىك وقىتۋشىسى» مەدالىن تاقتى. جالپى، رەيتينگ قورىتىندىسىمەن 100 پروفەسسور-وقىتۋشىعا جىل بويى تولەنەتىن ۇستەمەاقى تاعايىندالدى.

بۇل ءۇردىستى ۋنيۆەرسيتەت جىل سايىنعى داستۇرگە اينالدىرعان.

ۇستازدارىن ۇلىقتاعان ءبىلىم ورداسىندا بۇگىندە 500-دەن اسا مامان وقىتۋشى بولىپ قىزمەت اتقارادى. ونىڭ 22ء-ى عىلىم دوكتورى، پروفەسسور، 6-اۋى PhD دوكتورى، 217ء-ى عىلىم كانديداتى مەن دوسەنت، 179-ى عىلىم ماگيسترى.

سونداي-اق شارادا ءبىرقاتار ۇستازدار «نۇر وتان» پارتياسى قىزىلوردا وبلىستىق فيليالىنىڭ العىس حاتىمەن، «قورقىت اتا اتىنداعى التىن مەدالمەن»، ۋنيۆەرسيتەت رەكتورىنىڭ العىس حاتىمەن ماراپاتتالدى.

ارداگەر-ۇستازدار اراسىندا وتكەن شاحمات ءتۋرنيرىنىڭ ناتيجەسى جاريا ەتىلىپ، جۇلدەگەرلەرگە باعالى سىيلىقتار بەرىلدى.

شارا سوڭى كونسەرتتىك باعدارلاماعا جالعاسىپ، ارداگەر-ۇستازدارعا اق داستارحان جايىلدى. 

---