InfoHub Logo

بىلتىر بيۋدجەتتىڭ تازا يگەرىلۋى 99،99 پايىز بولدى. بۇل تۋرالى ق ر پارلامەنتى سەناتىندا ۇكىمەتتىڭ 2018 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبىن تانىستىرۋ  بارىسىندا پرەمەر-مينيستردىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ءمالىم ەتتى.

«رەسپۋبليكالىق بيۋدجەتتىڭ شىعىستارى 9 ترلن 637 ملرد تەڭگەگە اتقارىلدى. بۇل قارجى 12 مەملەكەتتىك باعدارلامانىڭ، 36 ستراتەگيالىق باعىتتاردىڭ جانە 328 بيۋدجەتتىك باعدارلامانىڭ جۇزەگە اسىرىلۋىنا جۇمسالدى. 18،8 ملرد تەڭگە اتقارىلمادى. ونىڭ ىشىندە ۇكىمەت رەزەرۆىنىڭ بولىنبەگەن قالدىعى 17 ملرد تەڭگەنى جانە ۇنەمدەلگەن قارجى 0،3 ملرد تەڭگەنى قۇرادى. بۇل شىعىستار بيۋدجەت كودەكسىنە سايكەس يگەرىلمەۋ سوماسىنا جاتپايدى. سوندىقتان تازا يگەرۋ 99،99 پايىزدى قۇرادى دەپ ايتا الامىز»، - دەپ ءتۇسىندىردى ءا. سمايىلوۆ.

ونىڭ اتاپ وتۋىنشە، 1،5 ملرد تەڭگە كەلىسىمشارتتى جاساسۋ تالاپتارىنىڭ وزگەرۋى مەن جۇمىس كەستەسىنىڭ كەشىگۋ سەبەبىنەن يگەرىلمەگەن.

وسى ورايدا تاراتىلعان مالىمەتتەرگە قاراعاندا، قارجىنىڭ يگەرىلمەۋى ءبىرقاتار اكىمشىلەرگە تيەسىلى بولدى. بۇل رەتتە قورعانىس جانە اەروعارىش ونەركاسىبى مينيسترلىگى - 309،6 ملن تەڭگە، ءبىلىم جانە عىلىم مينيسترلىگى - 254،9 ملن تەڭگە، قورعانىس مينيسترلىگى - 213،5 ملن تەڭگە، اۋىل شارۋاشىلىعى مينيسترلىگى - 159،7 ملن تەڭگە، سونداي-اق ۇلتتىق ەكونوميكا مينيسترلىگىندە 149 ملن تەڭگە بولدى.

«ەسەپتى جىلى 12 مەملەكەتتىك باعدارلامانىڭ ىسكە اسىرىلۋىنا بارلىق قارجىلاندىرۋ كوزدەرىنەن 2،6 ترلن تەڭگە قاراجات ءبولىندى. ەسەپ كوميتەتى ءوزىنىڭ ۇكىمەتتىڭ ەسەبىنە بەرگەن قورىتىندىسىندا مەملەكەتتىك باعدارلامالاردى ازىرلەۋ كەزىندە جىبەرىلگەن ءبىراز ادىستەمەلىك كەمشىلىكتەردى اتاپ ءوتتى. بۇل بەرىلگەن ەسكەرتۋلەر ۇكىمەتتىڭ باقىلاۋىنا الىناتىن بولادى. ولاردى ءبىز مەملەكەتتىك جوسپارلاۋ جۇيەسىن ءارى قاراي جەتىلدىرۋدە نازارعا الاتىن بولامىز»، - دەدى ۇكىمەت باسشىسىنىڭ ءبىرىنشى ورىنباسارى.

---