InfoHub Logo

ابىل ايتىسقاندارىن شوپتەي ءتۇسىرىپ جۇرسە دە، بالداي دەيتىن قىزدى جەڭە الماپتى. ونىڭ ءمىنىن ىزدەگەن اقىن: «وسى قىزدىڭ كوڭىل جاقىن ادامى بار ما؟» - دەپ قىز اۋىلىنداعى جىگىتتەردەن سۇرايدى. جىگىتتەر قابىلدىڭ تىلەنشىسى دەگەندى اتايدى. ابىل سونى تىلگە تيەك ەتىپتى:

وتىرعان قارسى الدىمدا بالدايىمىز،

بال تاتىر جەسە سەكەر تاڭدايىڭىز.

سەندەردى جاقىن-جاقىن دەي بەرەدى،

قابىلدىڭ تىلەنشىسى قاندايىڭىز؟

 

بالداي:

جاز بولسا – اۋىلداسىم، سۋسىنداسىم،

قىس بولسا – قورالاسىم، قىزىلداسىم.

قابىلدىڭ تىلەنشىسىن بىزگە قوسىپ،

باسىڭىز، ابىل-ەكە، اۋىرماسىن، -دەپ جەڭىپ كەتەدى.

بالداي قىزدى ابىل كۇيەۋگە ۇزاتىلعاننان كەيىن دە ىزدەپ بارىپ، تالاي ايتىسىپ جەڭىلەدى. ەندى بىردە ابىل بالدايدىڭ كۇيەۋىنىڭ كوزىنىڭ ءمىنىن ءبىلىپ، سونى ىلىك ەتەدى. ابىل:

اق بالداي، وتىرمىسىڭ ءىسىڭدى ىستەپ،

كىسىگە «سويلەس» دەگەن «ۇيگە ءتۇس» دەپ.

قولىڭا قونعان قۇسىڭ قۇتتى بولسىن،

بولىپتى كوزى تىرتىق، تۇلكى تىستەپ. 

جاراسار سالساڭ توقىم قارا كوككە،

قۇسىڭىز قىران با ەكەن، سالشى جەكە،

قۇسىڭنىڭ وڭ كوزىنىڭ جيەگى جوق،     

الماساق جيەكتەتىپ سەگىزەككە.

 

كۇيەۋىنىڭ مىنىنە قورىنعان بالداي ءسوز قايتارا الماپتى.

---