اجەسىنىڭ بالاسى
"وزدەرىڭمەن بىرگە بولسىن، - دەدى اجەسى اكە-شەشەسىنە. - ەندى مەكتەپكە باراتىن ۋاقىتى دا جاقىنداپ كەلەدى. اقىرى قالانىڭ مەكتەبىنە وقىتامىز دەپ وتىرسىڭدار عوي. ۇيرەنىسە بەرسىن. وزدەرىڭنىڭ بالالارىڭ عوي".
قالاعا كەلگەلى سودان بەرى جاقپاعانى، اۋەلى، اكە-شەشەسى تۇراتىن ءۇي بولدى. اياداي عانا ءبىر بولمە ەدى. بىلاي شاپقىلاسا دا، بىلاي شاپقىلاسا دا شەشەسىنەن ەسكەرتۋ الىپ قالا بەرەدى. ءبىراق ونى وڭايلىقپەن مويىنداۋعا جوق. كەيدە وتىرىپ الىپ ۇرسىسادى. ال تىم قاتتى كەتىپ بارا جاتسا، كانىگى ادىسىنە كوشەدى. ءوزىنىڭ قورعانۋ ءتاسىلى بار. جىلايدى. جىلاپ وتىرىپ "سەندەردى اجەمە ايتامىن" دەپ قورقىتادى.
كەيدە اناسى ۇيالى تەلەفونىن الا سالىپ، اجەسىنە قوڭىراۋ شالاتىنى بار. وندايدا اناسى اجەسىنە "ءبىزدى اجەمە ايتامىن دەپ قورقىتىپ جاتىر" دەپ كۇلەدى.
سودان كەيىن-اق اجەسى بار شارۋاسىن تاستاپ، وسىندا ارتىنىپ-تارتىنىپ جەتەر ەدى. نەمەرەسىن اينالىپ-تولعانادى. اجەسى اكەلگەن ءتاتتى، دامدىلەردى جەپ، سونىڭ الدىندا مەرەيى ءوسىپ، مەيىرلەنىپ وتىرادى.
كەيدە وسى ۇيدەگى ۇپ-ۇلكەن ەكى ادامنىڭ قالايشا ءوزىن اجەسى سياقتى تۇسىنبەيتىندىگىنە تاڭعالادى. اكەسى اۋەلدە جىلى ۇشىراپ قاراۋشى ەدى. ءقازىر ول دا سالقىن. ءوزى ىستەيتىن قارا جۇمىستان سىلەسى قاتىپ، شارشاپ كەلەدى. سوڭعى ۋاقىتتا داۋىس كوتەرەتىن دە بولىپ ءجۇر. مۇندايدا ءوزىنىڭ قورعانۋ تاسىلىنە كوشەدى. كۇشىمدى سارقىپ المايىن دەگەندەي، اۋەلدە جاي باستايدى. بەرىدە توقتاتا قويسا، سول جەردەن تىيىلا قويماق. ءبىراق كەيدە ەرلى-زايىپتى ەكەۋى بىر-بىرىمەن ۋادەلەسىپ العانداي، تىرس ەتىپ ۇندەمەيدى. مۇندايدا داۋىس ۇدەي تۇسەدى. اكەسى دە، شەشەسى دە جۇزدەرى قۋقىل تارتىپ، قۇلاقتارىن قاتارلاسا تارس باسار ەدى. "قويا قويشى ەندى، - دەيدى ەكەۋى دە جارىسا، - سەن جاقسىسىڭ، قويا عوي".
"باعانادان بەرى سولاي دەمەيسىڭدەر مە؟"
سوندا دا تىم ۇزاپ كەتتىم، كىلت توقتاۋعا بولمايدى دەگەندەي، اقىرىن-اقىرىن بارىپ باسەڭدەيتىنى بار.
كەيدە اناسىمەن بىرگە بوپەسىن ويناتىپ وتىرادى. بۇل وزىنە ۇنايدى. ءماز بولا كۇلەدى. ال كەيدە ءتالتيىپ تۇرعان بوپەسىن يىعىنان قۇشاقتاپ، باۋىرسىنىپ وزىنە قاراي تارتادى. مۇندايدا ماماسى شار ەتە تۇسەدى: "ولتىرەسىڭ بە بالانى؟! قىستىڭ عوي موينىنان!" جاۋاپ ورنىنا سىقىلىقتاپ تۇرىپ كۇلەدى. ونىسى كوزىن جىپىلىقتاتىپ، وسىعان قارسى كەلمەيىنشى دەگەندەي، يلەۋىنە كونە بەرەدى.
كەيدە تۇسىندە دە ماماسىمەن ۇرسىسىپ جاتادى، ال كەيدە ۇيىقتاپ جاتىپ تا سىقىلىقتاپ كۇلەدى.
ەندى ءبىرشاما ۋاقىتتان كەيىن مەكتەپكە بارادى. بالكىم، مەكتەپتە ەركەلىگىنە بايىپپەن قارايتىن ادەمى ءبىر مۇعاليما تاتەي كۇتىپ وتىرعان شىعار.
You Might Also Like
-
بالالارعا سانداردى تومەندەگى ءادىس ارقىلى ءتۇسىندىرۋ، قۇر سوزبەن تۇسىندىرگەننەن پايدالىراق، وڭايىراق بولۋى مۇمكىن.
