InfoHub Logo

الداعى 5 جىلدا ونەركاسىپ سالاسىنا 113 مىڭعا جۋىق مامان قاجەت. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى.

«بۇگىنگى تاڭدا 2،3 ملن. ەكونوميكالىق بەلسەندى جاستاردىڭ ىشىندە 42 پايىزى جوعارى ءبىلىمدى، 32 پايىزىنىڭ ورتا كاسىبي ءبىلىمى بار، ال 26 پايىزى ورتا مەكتەپ باعدارلاماسىن يگەرگەن ازاماتتار. بۇلاردىڭ ىشىندە 1،7  ملن.-ى جالدامالى جۇمىسشىلار، 525 مىڭى ءوزىن ءوزى جۇمىسپەن قامتىعان ازاماتتار. ال ولاردىڭ 10،3 پايىزى عانا  بۇگىنگى تاڭدا ونەركاسىپتە جۇمىس ىستەۋدە»، - دەدى دۇيسەنوۆا.

ونىڭ سوزىنە قاراعاندا، جوعارى جانە ورتا كاسىبي ماماندىققا يە  بولعان جاستاردىڭ اراسىندا ينجەنەرلىك، تەحنيكالىق كاسىپتى تاڭداعان ازاماتتاردىڭ ۇلەسى وتە تومەن. ال جەرگىلىكتى ورگاندارعا قاراستى كاسىپتىك ءبىلىم بەرەتىن وقۋ ورىندارى ءالى دە بولسا ەڭبەك نارىعىنىڭ سۇرانىسىنا ساي ەمەس ماماندىق يەلەرىن دايىنداۋدا.

«ماسەلەن وتكەن جىلى وقۋ بىتىرۋشىلەردىڭ 17 پايىزىن ەكونوميستەر، 13،8 پايىزىن زاڭگەرلەر، 48  پايىزىن باسقا دا گۋمانيتارلىق سالا ماماندارى قۇرادى. بۇعان دالەل رەتىندە مىناداي ستاتيستيكاعا توقتالعىم كەلەدى. وتكەن  جىلى جۇمىس بەرۋشىلەر 197 مىڭ بوس جۇمىس ورىندارىن جاريالادى. سونىڭ  ىشىندە ۇلەسى 16،6 پايىزدى قۇراعان  يەنجەنەرلىك-تەحنيكالىق ماماندىققا دەگەن قاجەتتىلىك جىل بويىنا جابىلماي قالدى. ەگەر ونەركاسىپتە جۇمىس ىستەيتىن جۇمىسشىلاردىڭ اراسىندا جاسى  55-تەن اسقان ازاماتتاردىڭ ۇلەسى 12 پايىزعا جۋىق ەكەنىن ەسكەرسەك، وندا الداعى 5 جىلدا بىزگە  ونەركاسىپ سالاسىنا 113 مىڭعا جۋىق ازاماتتاردى دايىنداپ، وندىرىسكە ارالاستىرۋ قاجەتتىلىگى تۋىنداپ وتىر»، - دەدى مينيستر.

وسىعان وراي تامارا دۇيسەنوۆا وبلىستاردىڭ، استانا مەن الماتى قالالارىنىڭ اكىمدەرىنە بيىلعى جىلى ورتا كاسىپتىك ءبىلىم بەرۋ مەكەمەلەرىنە مەملەكەتتىك تاپسىرىستى  ەڭبەك نارىعىنداعى سۇرانىسقا ساي، ياعني، وتكەن جىلى جابىلماي قالعان بوس ورىنداردى، جۇمىس بەرۋشىلەردىڭ بيىلعى جىلعى قاجەتتىلىگىن ەسكەرە وتىرىپ ورنالاستىرۋدى ءوتىندى. 

دەرەككوز: قازاقپارات

---