InfoHub Logo

زاماناۋي تالاپتارعا سايكەس، بۇگىنگى بالا، ەرتەڭگى مامان باسەكەگە قابىلەتتى بولۋى ءۇشىن بارلىق مەكتەپتەر جاڭارتىلعان ءبىلىم مازمۇنىنا كوشەدى. بۇل تۋرالى بۇگىن ورتالىق كوممۋنيكاسيالار قىزمەتى وڭىرلىك فيليالىندا بقو ءبىلىم باسقارماسىنىڭ باسشىسى ايگۇل مىڭبايەۆا ءمالىم ەتتى.

ونىڭ ايتۋىنشا، 12 جىلدىق بىلىمگە كوشۋ يدەياسىن ەلباسى 2001 جىلى ءبىلىم جانە عىلىم قىزمەتكەرلەرىنىڭ سەزىندە العان ۇسىندى. 2002 جىلى وسىعان كوشۋ جونىندە تاجىريبە جۇمىستارى باستالىپ، ءتيىستى نورماتيۆتىك-قۇقىقتىق بازا جاسالدى. 2003-2004 وقۋ جىلى وبلىستىڭ ءتورت مەكتەبى تاجىريبەگە قاتىسىپ، وسى ءبىلىم ورداسىنىڭ تۇلەكتەرى ۇبت قورىتىندىسى بويىنشا ورتاشا 92،6 بالل جينادى. ۇبت-عا قاتىسقان 33 وقۋشىنىڭ 18ء-ى نەمەسە 54،5 پايىزى مەملەكەتتىك گرانت يەگەرى اتاندى.

مەملەكەت باسشىسى 2011 جىلى قازاقستان حالقىنا جولداۋىندا 2020 جىلى 12 جىلدىق مەكتەپ تولىقتاي قىزمەت ەتۋى قاجەتتىگىن اتاپ وتسە، «100 ناقتى قادام» ۇلت جوسپارىنا سايكەس 2016-2017 وقۋ جىلىنان باستاپ ەلىمىزدە جاڭارتىلعان ءبىلىم مازمۇنىنا كوشۋ جۇمىستارى قولعا الىندى.

12 جىلدىق ءبىلىم بەرۋگە كوشۋدىڭ نەگىزگى ماقساتى - 5-6 جاستاعى بالالاردى 0ء-ىنشى سىنىپتا وقىتۋ جانە مەكتەپالدى دايارلىقتىڭ ءبىرىڭعاي ۇلگى باعدارلاماسىن ەنگىزۋ. 12 جىلدىق ءبىلىمنىڭ سىزباسى 0 سىنىپ + 11 سىنىپ قاعيداسىنا سايكەس قۇرىلدى.

جاڭارتىلعان ءبىلىم بەرۋ باعدارلاماسى كەستەگە سايكەس كەزەڭ-كەزەڭمەن ەنگىزىلەدى:

2016 جىلى - 1 سىنىپتار؛

2017 جىلى  - 1،2، 5،7 سىنىپتار؛

2018 جىلى  - 1،2،3،6،7،8،10 سىنىپتار؛

2019 جىلى  - بارلىق 1-11 سىنىپتار.

2015-2016 وقۋ جىلىندا جاڭارتىلعان ءبىلىم باعدارلاماسى رەسپۋبليكا كولەمىندە 30 پيلوتتىق مەكتەپتە، تەك قالا عانا ەمەس، اۋىلدارداعى ءبىلىم وردالارىندا دا سىناقتان ءوتتى. سونىڭ ىشىندە بقو-دان ورال قالاسىنداعى م.ىقسانوۆ اتىنداعى №36 جانە تەرەكتى اۋدانىنداعى شاعان ورتا مەكتەپتەرىندە اپروباسياعا 7 سىنىپتا ءبىلىم الاتىن 146 وقۋشى (131 وقۋشى قازاق تىلىندە، 15 وقۋشى ورىس تىلىندە ءبىلىم الدى) قاتىستى. ءبىلىم بەرۋدى 7 باستاۋىش سىنىپ جانە 16 ءپان مۇعالىمدەرى جۇزەگە اسىردى.

جاڭارتىلعان ءبىلىم مازمۇنىن ەنگىزۋدىڭ ساتتىلىگىن مۇعالىمدەردىڭ، وقۋشىلاردىڭ، اتا-انالاردىڭ بەيىمدەلگەن باعدارلامانى جاقسى قابىلداۋىنان  كورۋگە بولادى. سوندىقتان اتالمىش باعدارلاما 2016 جىلدىڭ 1 قىركۇيەگىنەن باستاپ ەلىمىزدىڭ بارلىق مەكتەبىنە ەنگىزىلدى. 

وبلىس بويىنشا 1 سىنىپقا 11373 وقۋشى قابىلدانسا، سونىڭ 7426-سى قازاقشا، 3947ء-سى ورىسشا ءبىلىم الادى. باستاۋىش مەكتەپتىڭ ۇلگىلىك وقۋ جوسپارىنا 14 ءپان، ونىڭ ىشىندە ۇشەۋى جاڭادان: «جاراتىلىستانۋ»، «اقپاراتتىق-كوممۋنيكاسيالىق تەحنولوگيالار (اكت)» 3 سىنىپتان باستالادى،  «كوركەم ەڭبەك» («بەينەلەۋ ونەرى» مەن «ەڭبەككە باۋلۋ» پاندەرى مازمۇنىنىڭ كىرىكتىرىلۋى ەسەبىنەن) ەنگىزىلدى. اعىلشىن ءتىلىن وقىتۋ ساعاتتارى كوبەيىپ، العاش رەت قازاق ءتىلدى مەكتەپتەردە 1 سىنىپقا «ورىس ءتىلى» ءپانى ەنگىزىلدى.

جاڭارتىلعان ءبىلىم مازمۇنىمەن قاتار 5 كۇندىك وقۋ اپتاسىنا كوشۋ كەزەڭ-كەزەڭمەن ەنگىزىلەدى.

جاڭارتىلعان ءبىلىم مازمۇنىنا كوشۋدە  ءداستۇرلى وقۋلىقپەن قاتار سيفرلىق وقىتۋ رەسۋرستارىن (سور) قولدانۋدىن ماڭىزى زور. سور - وقىتۋ بارىسىندا قولدانىلاتىن بەينەماتەريالدار مەن ينتەراكتيۆتى ساباقتار. ارينە، ولار پەداگوگتى وقىتۋ ىسىنەن شەتتەتپەيدى. ۇستاز سىنىپتاعى باستى تۇلعا بولىپ قالا بەرمەك. الايدا، بەينەماتەريالدار مەن ينتەراكتيۆتى ساباقتار ءمۇعالىمنىڭ بالالارعا قاجەتتى اقپاراتتى جەتكىزۋ مىندەتىن ايتارلىقتاي جەڭىلدەتەرى ءسوزسىز.

ءبىلىم بەرۋ ءۇردىسى بارىسىندا سيفرلىق وقىتۋ رەسۋرستارىن قولدانۋ ماقساتىندا 2016 جىلدىڭ كۇزىنەن باستاپ شاعىن جيناقتى مەكتەپتەردى قۇرالدارمەن (ەكران، پروەكتور، كومپيۋتەر، پروسەسور) تەحنيكالىق جابدىقتاۋ باستالدى. بۇل باعىتتا 2016 جىلى 106 شاعىن جيناقتى مەكتەپكە مۋلتيمەديالىق جابدىقتار ساتىپ الۋعا رەسپۋبليكالىق بيۋدجەتتەن 105 ملن. تەڭگە ءبولىندى. سونىمەن قاتار وبلىستىڭ 157 مەكتەبىندە  Bilimland.kz ءبىلىم بەرۋ تۇعىرناماسىنىڭ مۇمكىندىكتەرى وقۋ پروسەسىندە قولدانىلۋدا، بۇل ينتەراكتيۆتى ساباقتارعا قاتىسۋعا مۇمكىندىك بەرەدى، سونىمەن قاتار مەكتەپ باعدارلاماسى نەگىزىندە جاساقتالعان قازاق، ورىس، اعىلشىن تىلىندەگى وقىتۋ رەسۋرستارىمەن جابدىقتالعان.

«نازاربايەۆ زياتكەرلىك مەكتەبى» دەربەس ءبىلىم بەرۋ ۇيىمىنىڭ «پەداگوگيكالىق شەبەرلىك ورتالىعى» جانە «ورلەۋ» بىلىكتىلىكتى ارتتىرۋ ۇلتتىق ورتالىعى» بازاسىندا جاڭارتىلعان ءبىلىم بەرۋ مازمۇنى اياسىندا بىلىكتىلىك ارتتىرۋ كۋرستارى ۇيىمداستىرىلدى.   وقىتۋ بارىسىندا 2500-دەن استام باستاۋىش سىنىپ، قازاق ءتىلى مەن ورىس ءتىلى، اعىلشىن ءتىلى ءپانىنىڭ مۇعالىمدەرى، بەيلەنەۋ ونەرى مەن تەحنولوگيا، مۋزىكا جانە دەنە شىنىقتىرۋ ءپانىنىڭ مۇعالىمدەرى قامتىلدى.

«ءبىلىم باسقارماسىنىڭ بۇيرىعى نەگىزىندە پەداگوگيكالىق شەبەرلىك ورتالىعىمەن بىرلەسە وتىرىپ، ءار اۋداندا جاڭارتىلعان ءبىلىم مازمۇنىنا قولداۋ كورسەتەتىن 44 جەتەكشى مەكتەپ بەكىتىلدى، ولارعا 345 ماگنيتتىك مەكتەپ تىركەلدى. وسىعان بايلانىستى ءبىلىم باسقارماسى جانىنان ۇيلەستىرۋ كەڭەسى قۇرىلىپ، جەتەكشى مەكتەپتەردىڭ جۇمىس جوسپارى جاساقتالىپ، ناقتى ىستەر اتقارىلۋدا»، - دەدى «قازاقپارات» تىلشىسىنە ايگۇل مىڭبايەۆا. 

---