InfoHub Logo

جىلى ەكەنىن سەزگەم وسى ءۇننىڭ مەن،
سەنىڭ ءۇنىڭ، انا، مەيىرىم بىلدىرگەن.
تەربەتكەندە ءالدي ايتىپ سول ۇنمەن،
بەسىگىمدە-اق، انا، سوندا كۇن كۇلگەن.

سول ءبىر ۇننەن ءومىر سىرىن ۇعا الدىم،
سودان ءبىلدىم تابيعاتىن ءجىر-اننىن.
ويانسام دا سول داۋىستى ىزدەپپىن،
جىلاسام دا سول ءۇندى ەستىپ جۇباندىم.

وعان الەمدەگى بىردە-بىر ءتىل تانىس ەمەس ەدى. ءتىپتى ەستي قويسا دا، بوبەك وعان سەلت ەتە قويمايتىن. ويتكەنى وعان سولاردىڭ بارىنەن دە جاقىن، بارىنەن دە ىستىق، بارىنەن دە كۇشتى ءبىر ءتىل بولدى. بوبەك بۇل ءتىلدىڭ ءوزىنىڭ انا ءتىلى دەپ اتالاتىنىن بىلگەن جوق. تەك بۇل تىلدە ءوزىنىڭ اناسى سويلەيتىن ەدى - بوبەككە بۇل ءتىل سوندىقتان قۋاتتى بولدى، سوندىقتان ىستىق ەدى، سوندىقتان جاقىن بولدى. وسى تىلدە ءبىر تۇنىپ تۇرعان مەيىر بار ەدى. بۇل تىلدە بارلىق نارسە تۇسىنىكتى ەدى، تۇسىنىكسىز ەشتەڭە دە بولمايتىن. سوندىقتان بوبەك ۇيقىسىنان ويانا سالىپ، الدىمەن وسى ءتىلدى ىزدەيدى. وعان الەمدە بۇدان ارتىق ءتىل بولۋى دا مۇمكىن ەمەس.

بۇل ءتىلدىڭ بوبەكتىڭ انا ءتىلى ەكەندىگىن اناسى بىلەتىن. اناسى بۇل ءتىلدىڭ كيەلى بابالاردان جەتكەن ءتىل ەكەندىگىن بىلەدى. ايەل زاتىنا ءتان قاسيەتپەن انت-سۋ ىشەر. بۇل ءتىلدى بوبەگىنە بۇزباي جەتكىزۋ - بورىشى. ويتكەنى بابالار بوبەكتىڭ بابالارى عوي. ونىڭ بابالارى كۇشتى بولعان. ونى بوبەكتىڭ ءوزى دە سەزەدى. ەگەر ولار كۇشتى بولماسا، وسىنداي اۋەزدى ءتىلدى مۇراعا قالدىرىپ كەتەر مە ەدى.

كەش باتا بوبەك ۇيقىعا جاتادى. ءبىراق ول ەلەگىزىپ الدەنەنى ىزدەيتىن. وسى كەزدە قاراشا ۇيدەن انا ءالديى ەستىلەدى. بۇل ءبىر عاجايىپ مۋزىكا ەدى. بۇكىل ءون بويىندا دالانىڭ ءۇنى جاتاتىن. سول دالانىڭ بوياۋىن بار يىرىمىنە، بار بويىنا ءسىڭىرىپ العان ساز ەدى. ول كۇشتى ساز. ونىڭ بويىندا بابالاردىڭ قۋاتى جاتىر. وسى اۋەز بوبەكتىڭ تىلىندەگى قاسيەتتى سوزدەردى بوبەكتىڭ قۇلاعىنا جەتكىزەدى. ال قاسيەتتى سوزدە قاسيەتتى كيە بار. ول بوبەكتىڭ انا تىلىندە ايتىلاتىن سوزدەر.

قاراشا ءۇيدىڭ سىرتىندا - اسپاندا جۇلدىز جىمىڭ قاعادى. سۇلۋ اي كۇلىمدەيدى.

قاراشا ۇيدە گاۋھار جوق ەدى. ءبىراق وندا انا ءالديى بار عوي. وندا بوبەك ۇيىقتاپ جاتىر. مۇمكىن ونىڭ بولاشاعى زور بوبەك شىعار.

بوبەك ءوستى. ەندى ونىڭ جان-دۇنيەسى ءبىلىم ىزدەدى. اينالادا بوبەككە تانىس ەمەس نارسەلەر كوپ ەدى. ول جاراتىلىستىڭ جۇمباعىن شەشكىسى كەلەتىن. وسى كەزدە وعان انا ءتىلى كومەككە كەلدى. بوبەك وسىنىڭ بارلىعىن ءوزىنىڭ انا تىلىندە دە الا الاتىندىعىنا قۋاندى. ويتكەنى بۇل ءتىل وعان بەسىگىنەن تانىس ەدى عوي. بوبەك وسى تىلدە بارلىعىن وڭاي ۇعىناتىن، وڭاي قابىلدايتىن، وڭاي تۇسىنەتىن. بۇل ءتىل وعان ەڭ جاقىن ءتىل ەدى. ول وسىعان قۋانىپتى.

"سەن نەتكەن قاستەرلى ءتىل ەدىڭ! - دەدى بوبەك ەندى ءوزىنىڭ انا تىلىنە. - الەمدە ماعان سەنەن اسقان ءتىل جوق! سەن بارىنەن دە كۇشتىسىڭ!"

---