InfoHub Logo

ەرتەدە كۇيىك دەگەن قالانىڭ ماڭىنداعى جىلۋان وزەنىنىڭ بويىندا كەمپىر مەن شال ءومىر ءسۇرىپتى. قارتايعاندا كورگەن ەسەن ەسىمدى جالعىز بالاسى بولىپتى. ەسەننىڭ اكەسى وتباسىن اسىراۋ ءۇشىن كۇن سايىن دارياعا اۋ سالىپ، بالىق اۋلاپ ءناپاقاسىن سونىمەن تابادى ەكەن. اناسى بولسا كۇندە باقشالى جەردىڭ باسىنا بارىپ، كۇن ۇزاققا كەتپەنى قولىنان تۇسپەيتىن بولىپتى. ەسەننىڭ ءوزى بۇعاناسى قاتپاعان ءالى جاس بالا بولعاندىقتان ءبىر مەزگىل ءۇي جۇمىسىن ىستەپ، سودان سوڭ اۋقاتتان ارتىلعان بالىقتى قالا بازارىنا بارىپ ساتىپ كەلەدى ەكەن. ءسويتىپ جۇرگەندە ءبىر كۇنى ۇيقىعا كەتەر الدىندا ەسەنگە توسىن وي كەلىپ، قاعاز بەتىنە جازىپ، اناسىنىڭ جاستىعىنىڭ استىنا جاسىرىپ ءوزى ۇيىقتاپ قالادى.

تاڭەرتەڭ اناسى توسەگىن جيعان كەزدە جاستىعىنىڭ استىنان ءبىر قاعاز تاۋىپ الادى. ونداعى جازۋ مىناۋ ەكەن:

«اناسىنىڭ ەسەنگە كۇندەلىكتى بەرەشەك اقشاسى:

— بالىقتاردى تازالاعانى ءۇشىن – 50 تەڭگە،

— وتىن جيناعانى ءۇشىن – 30 تەڭگە،

— ءتىل العىش بالا بولعانى ءۇشىن – 50 تەڭگە،

— وت جاققانى ءۇشىن – 50 تەڭگە، بارلىعى 180 تەڭگە».

كەشكە ەسەن بازاردان كەلسە اناسى ونىڭ سۇراعان اقشاسىن دايىنداپ قويعان ەكەن. بالا اقشانى كورگەندە قاتتى قۋانادى. اناسى تەڭگەلەرگە قوسا ءبىر جاپىراق قاعاز دا قالدىرىپتى. وندا بىلاي دەپ جازىلعان ەكەن، — «ەسەننىڭ اناسىنا بەرەتىن قارىزى؛

— وسى ۇيدە وتكىزگەن 10 جىل باقىتتى ءومىرى ءۇشىن – ەشتەڭە،

— 10 جىل ىشىندە ىشىپ-جەگەنى ءۇشىن – ەشتەڭە،

— اۋىرعان كەزدەگى باعىم-كۇتىمى ءۇشىن –ەشتەڭە،

— جاقسى انا بولعانى ءۇشىن – ەشتەڭە. بارلىعى: ەشتەڭە.

قاعازدى وقىعان ەسەن ۇيالعانىنان قىزارىپ كەتىپ، باقشادا جۇرگەن اناسىنا جۇگىرىپ بارىپ، كەشىرىم سۇراپ، اقشانى قايتارىپ بەرىپتى.

---