InfoHub Logo

(نوۆەللا)

قارتتىقتىڭ توقپاعى ەڭسەسىن تۇقىرتقان اق سارى ءوڭدى قاريا بۇگىن قاتتى قاپالاندى. مۇنشالىقتى مازاسىزدانۋىنىڭ سەبەبى، وزگە ءۇشىن تۇككە تۇرمايتىن نارسە بولىپ كورىنگەنىمەن، ءوزى ءۇشىن وتە ماڭىزدى ەدى.

ول تۇستىك استان سوڭ، ءسال-پال مىزعىپ الىپ، تىسقا شىقپاق بولعان. ءدال سول كەزدە قولىنان تاستاماي، تايانىش ەتىپ كەلە جاتقان اق تاياعى تابىلماي قالدى. دالىزدە ىدىس-اياق جۋىپ جۇرگەن كەلىنىن شاقىرىپ، سۇراپ ەدى ول بىلمەيتىن بولىپ شىقتى. ءداۋ دە بولسا، نەمەرەلەردىڭ بىرەۋى ويناپ الىپ كەتكەن بولار دەپ، قولىمەن جەر تىرەپ امالداي تۇرىپ، ەسىك الدىنا شىققاندا مۇنىڭ اق تاياعىن قاق ءبولىپ، ءبىر جارتىسىنىڭ ۇشىن بالتامەن ۇشكىرلەپ وتىرعان ەڭ كەنجە تەنتەگىن كوردى. ءوزىنىڭ كوك ەسەگىن شۇقيتىن نارسە جاساپ وتىرعانىن سەزدى. ءوزى دە تالاي جاساعان عوي ونى. سونىسى بىردەن ەسىنە ءتۇسىپ، تاماعىنا اششى وكسىك تىرەلىپ، تۇرىپ قالدى. ءلام-ميم دەمەدى. اتاسىنىڭ پۇشايمان بولىپ تۇرعان ءحالىن اڭعارعان كەلىنى: «اتا، سوعان بولا نەسىنە رەنجيسىز، بالاڭىز كەلسىن، سىزگە ودان دا زور تاياق جاساتىپ بەرگىزەمىز. ءتىپتى توبىلعىنىڭ وزىنەن»، — دەپ قوسىپ قويدى. اقساقالعا كەلىنىنىڭ ءسوزى اسەر ەتكەن جوق.

شىن مانىندە، الگى تاياق مۇنىڭ قىمبات دۇنيەسى بولاتىن. ونى تۋعان اعاسى تاڭجارىق سوناۋ قاراتاۋدىڭ قويناۋىنداعى ۇشقاتتىڭ وقتاي ءتۇزۋ بۇتاعىنان كەسىپ اكەلىپ: «ەرتەڭگى كۇنى بەلىڭنەن كۇش كەتكەندە تىرەك ەتەرسىڭ»، — دەپ بەرگەن ەدى. وعان دا وتىز شاقتى جىل بولىپ قالىپتى-اۋ. كوپتەن بەرى سول تاياقتى جانىنا سەرىك ەتىپ، قولىنان تاستاعان ەمەس. ەندى مىنە، وسى قىمبات مۇلكى نەمەرەسىنىڭ قولىندا كەتتى. ويىن بالاسى عوي، نە تۇسىنەدى، ءتايىرى...

— ياپىراي، كەشەگىنىڭ مۇلكى ەدى. سوڭى جاقسىلىق بولعاي، — دەپ كۇبىرلەدى قاريا.

ول قالت-قۇلت ەتىپ، ۇيگە قايتا كىرە بەرگەن... سول ساتتە اۋلادان الدە ءبىر جاقتان كەلگەن ۇلكەن ۇلىنىڭ قۇمىعىڭقى داۋىسى شىقتى. ول ايەلىنە باسەڭ داۋىسپەن: «تاڭجارىق اتام بۇ دۇنيەدەن ءجۇزىن بۇرىپتى، ءقازىر كوكەمە ۇلكەندەر جاعى قازانى ەستىرتۋگە كەلەدى»، — دەپ جاتىر ەكەن. قاريا قارالى حاباردى ەستىگەن بويدا سىلق ەتە وتىرا كەتتى. «باسە، — دەدى قاريا، — وتكەننىڭ ءبارى نەگە ەسىمە ءتۇستى دەسەم... مىقتى تاياقتار وسىلاي سىنادى عوي».

---