اقىل
ەسكەنگە جۇرتتىڭ ءبارى اقىل ايتقىش ەدى. ەسكەننىڭ ءبىر مىنەزى زيانى جوق قوي دەپ ايتقان اقىلدى تىڭداي بەرەتىن. ءبىراق سول اقىل ايتقان جۇرت ەسكەندى وسى بالا قالاي-قالاي ءوزى دەپ سىرتىنان قىجىرتىپ تا كەتەتىنى بار ەدى.
ءبىر كۇنى ەسكەن ءبىر ءىس باستاماق بولدى. الگى باستاعىسى كەلگەن ءىسى وزىنە قىزىق كورىنگەنى سونشالىق، ۇيقىسى قاشىپ، سول تۋرالى ويلادى. ويشا جوسپار-جوباسىن سىزدى. ەندى وسى ويعا العان ءىسىن باستاپ كەتپەس بۇرىن بىرەۋدەن اقىل-كەڭەس سۇراعىسى كەلگەن ەدى. ەسكەننىڭ بۇل جاعىنان العاندا جولى بولعان جىگىت ەدى. وزىنە اقىل بەرەتىندەر كوپ. سولاردان بارىپ اقىل-كەڭەس سۇراپ الا قويماق.
ەسكەن وسى ويمەن وزىنە اقىل ايتاتىن جانداردىڭ بىرىنە جولىقتى. ويىن ايتا باستاعانى سول ەدى، الگى ادام "ءبىر مينۋت تا ۋاقىتىم جوق" دەگەنى. ەسكەن اۋەلدە تاڭىرقاپ قالدى. اشەيىندە وسى كىسى اقىل ايتقاندا ەسكەننىڭ جانىندا ساعاتتاپ وتىرىپ ايتپاۋشى ما ەدى؟
دەگەنمەن ەسكەننىڭ بۇعان بولا تاۋى شاعىلا قويمادى. ويتكەنى اقىل بەرەتىندەر ءالى دە كوپ ەدى. ەسكەننىڭ ەندى كەلەسى جولىققان كىسىسى ەسكەنگە "قايدان بىلەيىن، ءوزىڭ بىلەسىڭ عوي، ءوزىڭ بىلەسىڭ-داعى" دەي بەردى.
ەسكەننىڭ وسىلاي جولىققان ادامدارىنىڭ بارلىعى ءبىرى "ۋاقىتىم جوق" دەسە، ەندى ءبىرى "ءوزىڭ بىلەسىڭ" دەپ ەسكەننىڭ تاۋىن قايتارۋمەن بولدى.
ەسكەن ەندى ويلاعان ءىسىن ءوزىنىڭ اقىلىمەن قولعا الماقشى بولىپ شەشتى. باستاپ تا كەتتى. ءتىپتى باستاعان ءىسىن اياقتاۋعا دا جاقىن قالعانى سول ەدى، ءبىر كۇنى ەسكەننىڭ اۋلاسىنا وزىنە اقىل ايتاتىن جاندار دۇمەپ كىرىپ كەلگەنى. ەسكەن اۋەلدە ولاردى باستاعان ىسىنە بەرەكە تىلەگەلى كەلگەن ەكەن دەپ ويلاپ ەدى، الگىلەر ەسكەندى سالعان جەردەن كىنالاپ قويا بەردى. ايتۋىنشا، وسى كۇنى ەسكەن سياقتىلار ءبىر ءىستى باستاسا، ادامنان اقىل-كەڭەس سۇراۋ دەگەندى بىلمەيدى، ءوز بەتىنشە كەتەدى.
ەسكەن بۇل سوزگە اۋزى اڭقيىپ تۇرىپ قالدى. وسىنى ايتىپ تۇرعان العاش جولىققان كەزدە "ۋاقىتىم جوق" دەپ تۇرا جونەلەتىن كىسىسى ەدى.
ەسكەننىڭ ءبىر مىنەزى كىسىگە شامىرقانعاندا اۋزىنا ءسوز تۇسپەي قالاتىن. بۇل جولى دا ءسويتتى. الگىلەر ەسكەندى كىنالاپ-كىنالاپ اۋلادان شىعىپ جۇرە بەردى.
ەسكەننىڭ ەندى ەش نارسەگە زاۋقى سوقپاي قالدى. ۇيىنە كىرىپ ءسال قيسايىپ جاتقىسى كەلىپ ەدى، مازاسى بولمادى. سوناڭ سوڭ تۇرەگەلىپ ۇستەل جانىندا تۇرعان ورىندىققا كەلىپ وتىردى.
ۇستەل ۇستىندە كىتاپ جاتىر ەدى. ەسكەننىڭ ەشتەڭەگە ىقىلاسى بولماسا دا، الگى كىتاپتىڭ پاراقتارىن اۋداردى، اۋداردى دا مىنا جازۋلاردى وقىدى:
سەنبە جۇرتقا تۇرسا دا قانشا ماقتاپ،
اۋرە ەتەدى ىشىنە قۋلىق ساقتاپ.
وزىڭە سەن، ءوزىڭدى الىپ شىعار،
ەڭبەگىڭ، اقىلىڭ مەن ەكى جاقتاپ.
"قايران قارا شالىم-اي، - دەدى ەسكەن جازۋدىڭ ۇستىندەگى سۋرەتكە قاراپ، - باياعىدان بەرى اقىلدى سەنەن سۇراسامشى".
You Might Also Like
-
جەتى ۇرپاقتى بىلمەيمىز ءالى كۇنگە كوبىمىز. جانە بىزگە بەيمالىم ءبىزدىڭ اتا-تەگىمىز. ەڭ الدىمەن ءسوز ەتەم، ءبىرىنشى اتا – ءوز اكەم. ەكىنشىسى – اتامىز، ءۇشىنشىسى – ارعى اتا، ءتورتى...
