جاقسىلىق
ايناگۇلدىڭ كەيدە كىسىگە شالكەس كەلەتىن دە مىنەزى بار ەدى. بىردە كوپشىلىكپەن بىرگە داستارقان باسىندا وتىرعاندا بەيتانىس ءبىر جىگىتتىڭ "كىسىگە جاقسىلىق جاساۋ وڭاي ەمەس" دەگەن سوزىنە ايناگۇل "ونىڭ نەسى قيىن ەكەن، وزىڭدە بار بوپ تۇرسا، نەگە جاساماسقا؟ دەپ دۇرسە قويا بەرگەنى. جىگىت ۇندەگەن جوق.
ايناگۇل بىردە بازارعا بارعاندا بازارداعى قايىرشىعا جيىرما تەڭگە اقشا بەردى. وسىعان ءبىر ءتۇرلى كوڭىلى كوتەرىلىپ قالعانداي ەدى. ءوزىن كىسىگە جاقسىلىق جاساعانداي سەزىندى. سول كوڭىل-كۇيمەن زاتتارىن الىپ، اۆتوبۋسىنا وتىردى. ءبىراق اۆتوبۋسقا مىنگەننەن كەيىن "الگىگە نەگە ون تەڭگە بەرە سالمادىم" دەپ كوڭىل-كۇيىنىڭ بۇزىلعانى. وسى ويدى ويلاۋى مۇڭ ەكەن، مازاسى كەتتى. ايناگۇل ەندى الگىندە عانا قايىرشىعا اقشا بەرىپ جاتقان ءساتىن كوز الدىنا ەلەستەتتى. ەلەستەتىپ وتىرىپ، "سول جەردە مەنەن باسقا ەشكىم دە بەرىپ جاتقان جوق"
دەپ جۇرەگى ودان ءارى ماي ىشكەندەي كىلكىدى.
ايناگۇلدىڭ جانىندا ادەمىشە ءجۇزدى ءبىر اپاي وتىر ەدى. سول كىسى ايناگۇلگە قاراپ:
- ءسىڭلىم، مازاڭ كەتىپ وتىر عوي؟ نە جاعداي؟ - دەپ سۇرادى.
ايناگۇل بولعان جايدى ايتىپ بەردى.
- و، نەعىلعانىڭ، شىراعىم؟ سويتۋگە دە بولا ما؟
مىنا سوزدەن كەيىن ايناگۇلدىڭ جۇرەگى ودان ءارى كوتەرىلىپ كەتتى.
- توقتاڭىزشى! توقتاڭىز! ءتۇسىپ قالايىن!
ايناگۇل سومكەلەرىن كوتەرگەن كۇيى ايالداماعا توقتاعان اۆتوبۋستان اسىعىس-ۇسىگىس ءتۇستى دە، ايالدامانىڭ ورىندىعىنا سىلق ەتىپ وتىرا كەتتى.
- قارىنداس، ءبىر جەرىڭىز اۋىرىپ وتىر ما؟
ايناگۇلدىڭ كوزى الدىمەن جالتىراعان ەر ادامنىڭ اياق كيىمىنە ءتۇستى. سونان سوڭ ءساندى كيىنگەن ءبىر ەر كىسىنىڭ وزىنە قاراپ تۇرعانىن كوردى.
- بارىڭىزشى ءارى! - دەدى ايناگۇل شىتىنىپ.
- اۋ، ايتساڭىزشى، كومەك كەرەك بولسا...
- شارۋاڭىز بولماسىن مەندە!
ايناگۇل سومكەلەرىن كوتەرگەن كۇيى ايالدامادان ءارى قاراي ۇزاي بەردى.
"ەرەگىسكەندە ۇيگە دەيىن جاياۋ بارامىن، سول جيىرما تەڭگەنىڭ اقىسىنا".
- ايناگۇلمىسىڭ؟! شىراعىم-اۋ، ءتۇرىڭ نە بوپ كەتكەن؟!
ايناگۇل باسىن كوتەرىپ قاراعاندا وزىمەن كورشى تۇراتىن اپايدى كوردى. ايناگۇل كورشى اپايعا بازارداعى وقيعانى بايانداپ بەردى.
- و، سورى قايناعان!.. ۇنەمى شاشىلاسىڭ دا جۇرەسىڭ عوي ءوستىپ!
مىنانى ەستىگەندە ايناگۇلدىڭ بۋىن-بۋىنى بوساپ، كورشى اپايدى قۇشاقتاعان كۇيى بوتاداي بوزداپ قويا بەردى...
ايناگۇل بىردە كوپشىلىك جينالعان داستارقان باسىندا الگى داۋىستى تاعى دا ەستىدى:
- ادامعا جاقسىلىق جاساۋ وڭاي ەمەس.
ءجۇزىن بۇرىپ قاراعاندا وتكەندەگى جىگىتتى كوردى. ايناگۇل بۇل جولى تىرس ەتىپ ۇندەگەن جوق.
You Might Also Like
-
ءوزى ادامعا ۇيىرسەك، ءولىپ-وشىپ وينايدى. قيقۋلاسىپ جۇگىرسەك، قاشىپ ءجۇر دەپ ويلايدى.
-
مەن 3-سىنىپ وقۋشىسىمىن، اتىم - اسەماي. بيىل قازاقتىڭ "قالىڭ ەلىم قازاعىم، قايران جۇرتىم"، - دەپ وتكەن ۇلى اقىنىمىز - اباي قۇنانبايەۆ اتامىزدىڭ تۋعانىنا 170 جىل تولعانىن بىلەمىز. ءبىز ...
